Belgian GP-ah Oscar Piastri a chak

Ruah sur nasa vangin intlansiak hun pangngai aiin darkar khat leh a chanve ngawtin a hun sawn tlai a ni a, tlankawng huh leh ro inchhawk vel karah Oscar Piastri chuan Belgian Grand Prix-ah hnehtu dinhmun a luah.

Pathianni zan khan Spa-Francorchamps-ah Belgian Grand Prix hi tlan niin, McLaren driver Piastri a che fuh hle a, safety car a luh hnuah phei chuan nghet taka hmahruaiin a teammate Lando Norris hmaah a thleng.

Tun season chhungin Formula intlansiak vawi 13 an hmachhawn tawh, heng zinga paruk ngawtah McLaren driver-te hian pakhatna leh pahnihna dinhmun an luah ve ve tawh a, team dang tan hmun a kian tlem thei hle.

Australian driver Oscar Piastri hian kuminah vawi ruk hnehna a chang tling ta, point 266 hmuin driver championship-ah hma a hruai mek; amah hnaih bertu chu McLaren driver pakhat zawk Norris niin, an inkarah point 16 a awm.

Car intlansiakna sang ber hi season chawhnu lam an hmang chho ṭan mek. August 3, Pathianni zan dar 6:30 hian Hungaroring tlankawngah Hungarian Grand Prix an tlan leh dawn a, chumi hnuah Dutch GP-in a zui dawn a ni.

Piastri a lawm

Season hmasa chawhnu lam aṭangin McLaren an che fuh chho hle a, kuminah phei chuan midang tan elphak rual loh an ni - driver pakhat mai pawh ni loin an pahnihin an che ṭhe em em a, team thuneitu lam tan chuan lawmna belhchhahtu a ni ngei ang.

Belgian GP-a hnehna changtu Oscar Piastri chuan, "Ka tan chuan hnehna hlu tak a ni, intlansiak awlsam lo tak maiah hnehna ka chang. A tir aṭanga a tawp thlengin fimkhur em emin tlan a ngai a, a tawpah vannei ber ka ni.

"Tunlaia car ka khalh danah ka lungawi hle, hnehna chang tur erawhin tlan ṭhat ringawt a tawk lo a, vanneih tel a ngai bawk. Tun ṭumah kha chuan ka tan kawng a inhawng ṭha em em a, chumi chu bawhpelh phal chi a ni lo," tiin a sawi.

Intlansiak hnuhnung zawk British Grand Prix-ah pawh khan a tlan ṭha hle a, mahse Safety Car tlan laia chet dan fuh tawk lo avangin second 10 atan hrem niin, tualchhung tlangval Norris a chak phah ta zawk, tun ṭumah erawh Piastri a chungnung.

Zawhna a awm

Ruah a sur nasa a, chumi bakah tlankawng huh lutuk a ziaawm hun nghah a nih avangin inthlansiak hun pangngai aiin darkar khat leh minute 20 zetin an pawt tlai a, an tlan ṭan hnuah pawh lap li chhung chu Safety Car an tlan, hei hian zawhna a titam hle.

Inelna buatsaihtu lam chuan an nghah chhan hi an him tlanna tur a nih thu an sawi. Mahse, tun hma pawhin ruah sur leh kawng huh karah an intlansiak fo tawh, Lewis Hamilton leh Max Verstappen te chuan mak an tih thu an sawi zui.

Verstappen chuan, "Khatiang em ema rei kha nghah ngai tur niin ka hre lo," a ti. Hamilton pawhin, "Eng vangin nge rei tak chhung kan nghah a, tun aia hma khan tlan theih a ni reng si a," tiin a sawi a, season khat chhunga tlankawng an zawh thui ber turah an beisei a phak lo.

Driver tawnhriat nei ṭha pahnih hian an beisei angin season an hmang ṭha rih lo. Belgian GP-ah Verstappen hi palina a ni a, nomawi a kawl lai humhim a harsa tawh dawn. Hamilton chu pasarihna niin Ferrari a zawm hnuah chak ni hmel a la hmu rih lo a ni.