Khelh dan tur ruahmanna kan nei sa - Arteta

Premier League season thar atana inbuatsaih mek Arsenal chuan Pathianni tlai khan an striker thar Viktor Gyokeres chu an inkhelh hmain an tlangzarh a, coach Mikel Arteta chuan tlarhma lamah an khelh dan tur ruahmanna an nei sa tih a sawi.

Season hmasa khan Arteta hian tlarhma laiah Kai Havertz a hmang ṭhin, striker Gabriel Jesus a nei bawk - ani erawh hliam vangin a inkhel tam lo. A sira khel turin Bukayo Saka, Gabriel Martinelli leh Leandro Trossard te an awm bawk.

Arteta chuan, "Kan team min tichak zual thei tur player kan nei hi a lawmawm. Viktor hian nasa takin min tiṭha lehzual ngei ang tih pawh ka beisei, kan khelh dan tur pawh fel takin ruahmanna kan nei fel sa thlap.

"Viktor hian a tir aṭang khan kan hnena lo kal hi a duh a, inbiakna pawh kha a fuh nghal hle. Min rawn zawm lai boruak hi ngaihtuah ila, fans mai bakah team chhungah pawh nghawng a nei lian nghal hle a, boruak nuam tak a siam thei a ni," tiin a sawi.

Gunners hian AC Milan an hneh hnuah Pathianni tlai khan Newcastle United chu 3-2 in an hneh leh a, an match pathumna atan July 31, Ningani tlaiah Tottenham Hotspur an hmachhawn leh ang.

Arteta chuan, "Viktor hian training a la zawm lo a, chuvangin Spurs a hmachhawn thei dawn em tih erawh ka la sawi thei lo. Medical test neih lai chuan a taksa dinhmun engkim a ṭha; Sporting tana champion hlim a ni bawk avangin a rilru puthmang pawh a dik," a ti.

Arsenal tan Saka leh Martin Odegaard ten penalty an pet ṭhin a, anni pahnih bakah hian Havertz an kian leh zauh ṭhin bawk. Viktor Gyokeres an neih belh takah chuan tuin nge penalty pet ang tih chu zawhna awm nghal a ni a, coach Arteta pawh an zawt nghal.

Spanish manager Arteta chuan, "Viktor hi goal khung mi a ni a, penalty pawh pet thiam tak a ni. Chutihrualin, kan player neihsa zingah pawh penalty pet thiam tak tak an awm bawk a, engtianga kalpui tur nge tih chu anmahni lamin an hrethiam mai ang.

"Player lam aṭangin thutlukna siam fel a harsa a nih pawhin, a hunah tak keiman thutlukna ka siam mai ang," tiin a sawi a, an striker thar chuan penalty a pet ngei dawn tih a sawi thei rih lo a ni.