Harsa takin De Minaur a champion

Alex De Minaur chuan Washington Open title la turin a beih nasat a ngai hle, a khingpuiin match point a hmuh vawi thum ngawt inchhanhim chungin a tawpah chuan harsa takin a champion.

Australian tennis star De Minaur hian Alejandro Davidovich Fokina chu 5-7, 6-1, 7-6(3) in a hneh a, a tan chuan ATP 500 nomawi chawi hi chanchin lawmawm a ni ang, kum 2018 khan final lut mah se Alexander Zverev a hneh lo, tunah erawh a hun a thleng ta a ni.

Kum 26 mi De Minaur tan thil awlsam a ni lo, set hmasa ber a hloh phawt. Set hnihna la let mah se set hnuhnung berah Spanish player Davidovich Fokina a che ṭha hle a, a ball vuak a nain a dinhmun pawh a ṭha hman hle, a tawpah erawh De Minaur-a'n point pawimawh hmu ta zawkin a vannei zawkah a ṭang.

De Minaur chuan, "Tun hmain he hmunah hian ka inkhel tawh ṭhin a, final hial pawh ka lo thleng tawh. Ka tawnhriatte khan inrintawkna nasa tak min siamsak a, chumi chu a hunah tak ka hmang ṭangkai ta a ni," a ti.

United States-ah tennis inelna hrang hrang an hmachhawn mek. August tawp lam aṭangin US Open khelh a ni dawn a, hard court inelna lian atana inbuatsaihna a nih pah nghal avangin a pawimawh hle.