Osaka leh a coah Mouratoglou inṭhen

Naomi Osaka leh a coach Patrick Mouratoglou te chu kum khat pawh an thawkdun tling hman lo tihah an inṭhen - an thawhdunna a tawp thu hi Osaka chuan social media kaltlangin a puang a ni.

Grand Slam vawi li champion tawh Osaka chuan, "Patrick hnen aṭangin thil tam tak ka zir chhuak a, kan hun hman dun chhung kha a hluin a hlawk pawh ka ti hle. Coach a ni satliah lo a, mi ṭha leh fel tak, engkim hmachhawn thiam a ni tel bawk.

"Boruak dang kan hip a hun tawh a, chuvangin kan thawhdunna kan tihtawp rih a ngai. A kal zelna turah duhsakna ka hlan, mi ṭha tak a nih avangin malsawmna pawh dawng zel se la ka ti bawk," tiin a sawi.

Fa a neih hnuah Osaka hian theihtawp chhuah mah se ngai awh leh a harsat tawh a, tun season chhungin match 21-ah hnehna chang tawh mah se ṭum 11 chu a chak lo zawk a ni a, world ranking-ah pawh 51-na daih a nih avangin hmasawn a mamawh.

Australian Open 2021 nomawi a chawi hnuah Grand Slam a khel leh nual tawh a, mahse third round a la pel leh lo. US Open khelh hun a hnai a, tun hma lama a hlawhtlinna tawhna hmunah ṭha taka inlan tumin hma a la mek a ni.