East Bengal-in player contract an titawp
I League club East Bengal chuan Covid-19 vangin player leh official contract an titawp a, Kolkata club thutlukna hian dem a hlawh hle. East Bengal captain Lalrindika Ralte chuan, "Kan lungawi lohna hi Quess Corp hotu Ajit Isaac hnenah kan thlen tawh," tiin Vanglaini a hrilh.
Red and Gold player chanchin hi Football Players Association of India (FPAI)-in an hre tawh a, FPAI pawhin twitter kaltlangin an chhan tur thu an tichiang tawh.
A hma tawngah Didika
East Bengal captain Lalrindika chuan thuthar an hriat veleh hma an lak nghal thu a sawi a, Didika chuan, "Thutlukna kan pawm loh thu hi ziakin kan thlen a, player zawng zawngin hming an ziah hnan. Kei, vice captain Kassim Aidara leh senior player Johnny Acosta ten Quess Corp dintu Ajit Isaac ziakin kan thawn a, player dang zawngin company CEO Sanjit Sen hnenah lehkha thawn turin ka hrilh bawk," tiin a sawi a, April thla chhunga chhana an beisei thu Vanglaini a hrilh bawk.
Kolkata club-ah hian Mizo player pathum Lalrindika Ralte, Brandon Vanlalremdika leh PC Rohlupuia te an awm a, lockdown vangin City of Joy-ah hian an tang mek.
East Bengal winger Jaime Santos Colado chuan, "Club thutlukna hi a dik a, Covid-19 vangin player contract an ti tawp. Player-te'n thutlukna hi an pawm lo a, inremna neih tumin inbiak mek a ni," tiin a sawi. Spanish winger hian Kolkata club-ah hian kum hnih aia tam contract a la nei.
India ram pum lockdown vangin East Bengal-a foreign player pasarihte an tang vek a, Colado chuan, "Kan rama haw kan duh vek a, tun dinhmunah chuan club emaw embassy emaw aṭangin puihna kan dawng lo," tiin Kolkata-a an tan thu a sawi.
East Bengal-ah hian foreigner pasarih Spanish player pali Jaimie Santos Colado, Juan Mera, Marcos Jimenez Espada leh Víctor Perez te bakah Costa Rican defender Johnny Acosta leh Senegalese-French midfielder Kassim Aidara te an kawl a ni.
FPAI an lang e
Tun season-a East Bengal sponsor-tu hi Quess Corp an ni a, June thla hian club nena an insawmna an tihtawp tur thu an puang tawh. Quess Corp hian Inrinni khan e-mail hmangin player leh official hlawh an pek loh tur thu hi an hrilh.
FPAI chuan, "Covid-19 vangin club engmah hian a hun hmain contract an ti tawp thei lo. Player leh club inremsiamna a awm a ngai. Player-te nen kan inbe pawh reng a, a ṭul angin hmalak a ni ang," tiin twitter kaltlangin thuchhuah an siam.
Quess Corp dintu Ajit Isaac leh company CEO Sanjit Sen te biak pawh theihin an awm lo. FPAI general manager Cyrus Confectioner chuan, "Thla 4-5 vel khelh la ngai ni se, player nena inbiakremna a awm a nih chuan contract tihtawp hi a dik lohna a awm lo. Tunah erawh thla hnih khat chauh a ni a, player be rawn lo a, thutlukna an siam hi a dik lo hul hual a ni," tiin a sawi.
Kum 100-na leh buaina
East Bengal hian kumin August 1 hian kum 100 an tlin dawn a, lawmpui pawh an tum hle. Kolkata club hian Manchester United chahluh an tum a, inbiakna pawh thui tak a kal hman. Amaherawhchu English club pawisa phut zat a tam avangin Kolkata club-in an pe thei lo a, Ole Gunnar Solskjaer hote an rawn zin dawn ta lo.
Manchester United nen hian inbe fel ta pawh ni se Covid-19 vangin an ṭhulh a ṭul dawn tho. East Bengal hian kum 100 tlin lawm nan I League-ah champion ngei an tum a, an hmelma Mohun Bagan an champion ta thung. Khelmualah Red and Gold-in beisei an pha lo a, sum lamah harsatna an tawk bawk.
Amaherawhchu East Bengal hian season tharah ISL khelh an tum a, player biak fel pawh an nei tawh. Season thar atana sum an neih thoh avangin tun season-a player-te hian an chunga club thutlukna hi an hrethiam thei lo.