AFC thar leh MLS dinhmun hriat hun

I Day Football 2025-ah vawiin chhun dar 12:00 hian Aizawl FC leh MLS te an inkhel dawn. I League club Aizawl FC-in team thar an din a, MLS hi Lawngtlai aṭanga MPL khel tura inpetling hmasa ber an ni thung.

Aizawl FC hian season liam taa an player pawimawh Lalrinzuala, Lalbiakdika, Augustine Lalrochana, Lalthankhuma leh Lalchhawnkima te an chan a, academy aṭangin player 10 senior team-ah an sawn chho a; Vincent Lalduhawma, Eric Remruatpuia Chhangte leh Rohmingthanga te an lalut.

Season liam taa assistant coach R. Lalruatfela chu head coach-ah ruat a ni a, Kolasib tlangval tan chona thar a ni ang. Aizawl FC coach R-a chuan, "Chona thar a ni a, a phurawm khawp mai. I League club tana head coach hna han chelh chuan pressure chu a awm ngei a, mahse hlauhthawnna lam ni loin phurhna lam a ni zawk," tiin Vanglaini a hrilh.

Team chungchang sawi chhunzawmin R-a chuan, "Academy aṭanga kan sawn chhohte hi a tikimtu ringawt an ni dawn lo a, hmun pawimawh chang tur pawh an awm thei ang. Zozoa, Sawma Tlangte leh Hriata te kan la nei a, player chhuak tam mah se team ṭha tak kan la ni," tiin a player neiha a lungawi thu a sawi.

MLS dinhmun tur hriat thiam a la har a, chutihrualin R. Vanlalpeka hote an nih avangin Aizawl football kalhmang an hre dawn. Lawngtlai club-in M. Lalpektluanga, B. Rosangliana, Ricky H. Vanlalhriatsanga leh F. Lalchhanchhuaha te an nei a, Aizawl FC an hlau bik lo ang.

Tun ṭum inelnaah group B hi a har ber tura ngaih a ni a; MPL club pathum Aizawl FC, MLS FC leh Saikhamakawn te an awm a, pahnihin quarterfinal an luh dawn avangin MPL club zingah knockout stage lut lo an awm dawn.