Gyokeres-a'n training a zawm

Arsenal striker thar Viktor Gyokeres chuan nimin khan team training a zawm ta a, a teammate thar ten an lo lawm hle - Ningani tlaia Tottenham Hotspur nen an inkhelh hunah a inlan hman mai thei.

Sporting Lisbon aṭangin Gyokeres hian Gunners a zawm a ni a, Premier League season tir lama inkhelh hman ngei a duh avangin Portuguese club lam pawh a nawr na hle, tunah chuan a duh angin season thar inbuatsaihna pawh a nei hman.

Mikel Arteta naute hian Singapore-ah hun an hmang mek a, a hmain AC Milan leh Newcastle United an hmachhawn tawh. Spurs nena an inkhelhna tur erawh Kai Tak Sports Park, Hong Kong a ni thung.

Villarreal leh Athletic Club te nen Emirates Cup an khel zui ang a, season ṭan hmain match dang chu an khel tawh lo ang. August 17, Pathianni zan dar 9:00-ah Premier League an match hmasa ber atan Manchester United an lenchilh dawn a ni.