MBA Junior Official Championship ṭan

Mizoram State Sports Council in kum 50 a tlin lawmna chi khat atana buatsaih, NEXA Motors Yonex-Sunrise MSSC Golden Jubilee Celebration MBA Junior Official Championship 2025 chu nimin khan khelh ṭan a ni.

Mizoram badminton-a kum naupangte inelna sang ber hi Mizoram Badminton Association (MBA) in a buatsaih niin, Mizoram Badminton Centre, Zuangtuiah neih a ni a, August 1, Zirtawpniah final khelh a ni ang.

Badminton Association of India (BAI) hriatpuinaa neih inelna hi Under-11 aṭanga U19 inkar category 16-ah khelh a ni a, player 185 ngawtin inelna hmachhawnin, entry 253 a lut a, match 232 khelh a ni dawn bawk.

Mizoram Badminton Association YouTube channel-ah inkhel zawng zawng hi live-a en theih tura pekchhuah a ni a, India ram hmun hrang hranga badminton academy ṭhaa coaching kal mek Mizoram player ṭhate pawhin inelna hi an hmachhawn avangin a hmuhnawm hle.

MBA Senior Official Championship neih zawh taka Men's singles champion Vanlalmal-sawmzuala pawhin inelna hi a hmachhawn a, Women's singles category-a a lalṭhutthleng humtu H. Lalrinhlui pawh a inlan dawn bawk - anni pahnih ringawt inlan tur pawh hi en chhan tlak a tling.

Kum 13 mi lek ni chunga senior category inelna sang bera final lut thei, Tirza Lalremruati che vel pawh hi hmuhnawm a tling ṭhin a, kum 15 mi ni chunga Mizoram Badminton khawvel a hming chher tak, Malsawmhlua pawhin ennawm min chhawpsak leh ngei a rinawm.

MBA Junior Official Championship hi MSSC bakah NEXA Motors leh Yonex-Sunrise ten an sponsor bawk a ni.