Son a chhuak lo mai thei

Major League Soccer club Los Angeles FC chuan Tottenham Hotspur captain Heung-min Son chu lakluh ngei tum mah se, Spurs coach thar Thomas Frank chuan season thara Son kawl chhunzawm zel a beisei thu a sawi.

Thomas Frank chuan, "Spurs tana Son-a sulhnu hi a ropui thlawt a, Tottenham tana player ṭha bik a ni. Ka hmuh dan chuan season tharah pawh kan tan player ṭangkai tak a nih theih ka ring.

"Training a zawm aṭangin a rilru puthmang a dik a, a taima a, player dang a nawr kal reng bawk. Hengte hian min tiphur hle a ni," a ti a, Son chu enkawl chhunzawm a beisei thu a sawi.

Kum 33 mi Son hian Spurs-ah kum khat chauh contract a nei tawh a, Thomas Frank nen a hma hun chungchangah inbiakna pangngai tak an la nei lo nia sawi a ni.

LAFC hian Son hi kum khatah pound maktaduai 15 hlawhtir an inhuam nia sawi a ni a, a awm lo hran lo. Son hian London club tan match 454-ah goal 173 khungin, assist vawi 101 a nei a, season hmasa khan Europa League-ah a champion pui.

Spurs hian Asia-ah tour nei mekin, Ningani tlaiah Arsenal chu Hong Kong-ah an inkhelhpui ang a, August thlatirah Son-a te ram South Korea-ah kalin, Newcastle United nen an inkhel leh ang.