Liverpool keeper Alisson a haw

Asia khawmualpuia pre-season tour nei mek, Liverpool goalkeeper Alisson chuan Reds squad chu mimal thil avangin a hawsan a, a chhan tak hi chiang taka tarlan a awm lo.

Brazil number 1 keeper hi nimina Liverpool team, fan-te hmuh theih tura training zingah pawh a tel lo a, UK lama Liverpool an kir leh veleh squad hi a lo zawm ve leh dawn chauh a ni.

Liverpool hian Inrinni khan, Hong Kong-a inkhelah AC Milan chu 4-2 in an ngam lo a, vawiin tlai dar 4:00 hian Yokohama F Marinos nen friendly match an khel leh ang.

Alisson awm loh takah chuan, Valencia aṭanga Reds zawm hlim Giorgi Mamardashvili chuan si ban a nghak dawn tihna a ni - ani bakah hian Freddie Woodman, Armin Pecsi leh Kornel Misciur te chu Reds-in Asia tour-a goalkeeper an hruaite an ni.

Liverpool hian an tour neih mek aṭangin player pathum an chhuahna a ni a, hliam vanga Joe Gomez an hawtir hnuah, forward Luis Diaz chu Bayern Munich a pan dawn avangin, medical nei turin Germany lamah an kaltir a, tunah mimal thil avangin Alisson a haw leh ta.

Arne Slot-a naute hian Japanese club nen an inkhelh zawhah Anfield lam panin an puanthuah an tel zui ang a, August 4 zan hian an khelmualah Athletic Bilbao nen friendly match vawi hnih an khel ang.

Reds hian August 10, Pathianni zanah season thar ṭan nan Crystal Palace nen FA Community Shield an khel ang a, August 15 zanah season thar atana an EPL match hmasa ber khelin, Bournemouth an mikhual dawn bawk a ni.