Antony-a'n amah duhtu a hnar

Manchester United chhuahsan tur zinga mi Antony chuan an ram Brazil aṭangin sawmna hmu mah se a hnar a, Brazilian forward hi season thara a khelhna tur hmun a la chiang lo tluang zel.

Antony hi Ruben Amorim hnuaia amah ang thoa tlatlum lo, Alejandro Garnacho, Jadon Sancho leh Tyrell Malacia te nen a hrana training neihtir an ni hial a, player pali hi an la hralh theih loh avangin United hi an duh angin transfer bazar-ah an la che hleithei lo niin an sawi.

Al Nassr nen pawha sawizawm hlawh mek Antony hi a professional zinkawng zawh ṭanna club, Sao Paulo chuan an hnena kir turin sawm mah se a hnar a, Botafogo sawmna pawh a hnar niin khawthlang media ṭhenkhat chuan an tarlang.

Kum 25 mi Antony hian August 2022 khan boruak nei hat khawpin Manchester United a pan a, a man ringawt pawh pound maktaduai 82 a nih avangin fan-te beiseina a sang hle.

Antony hian beisei erawh a phak lo a, United tan match 96 khelin goal 12 a khung hram a, assist vawi nga a nei. Season hmasa chawhnu lam phei chu Real Betis-ah loan-in a khel a, Spanish club tan a khel chhe lo.

Antony hian match 26 khelin goal kua a khung a, assist vawi nga a nei bawk. Mahse, United hian Antony hi €60mtd vel an chhiar nia sawi a ni a, hei vang hian Betis hian an rim zui ngam lo a ni.