July-ah MotoGP an beisei
MotoGP chief Carmelo Ezpeleta chuan July thla velah inelna neih ṭan theih an beisei a, season ṭhulh tawp hlauhthawn awmah ding hman mah se neih theih hram chu an la tum.
Covid-19 vangin bike intlansiakna sang ber hi an la ṭan thei lo, inelna pasarih chu a hun an sawn tawh bakah Qatar Grand Prix chu tun season atan an ṭhulh fel der tawh.
Tun dinhmunah chuan intlansiak hun pangngaia neih tum hi 12 a la awm. A lan dan chuan August thlatir a tlan tur Czech Republic Grand Prix chu an neih hmasak theih a ni dawn a, a hun an sawn tawh zinga mi hi July thla vela tlan theih a awm mai thei.
MotoGP chief Carmelo Ezpeleta chuan, "Ruahmanna leh duhthusam kan nei ngun ta hle, tuna kan beisei dan thar berah chuan July aṭanga November chhung hian season hman theih kan beisei.
"Kan hun ruahman anga kan tlan thei a nih chuan world championship pangngai a awm theih hmel. Amaherawhchu a hun hi sawn tlai leh a ngai a nih chuan thil a pangngai anga kaltlangpui a harsa tawh ang," tiin a sawi.
Coronavirus hi Italy leh Spain ten an tuar nasa zual a, anni ram pahnih hi rider tamna a nih bakah team ṭhenkhat inben belna hmun a nih avangin inelna neih kawngah harsatna a awm zual phah.