Sesko duhtu United hmaah Cherries
Manchester United chuan season thar atana inpuahchah nan United States-ah Premier League Summer Series an khel mek a, an match hmasa berah West Ham United 2-1 in an hneh tawh. July 31, Ningani zing dar 7:00 hian Soldier Field, Chicago-ah Bournemouth an hmachhawn dawn. Cherries hian Everton 3-0 in an hneh thung a, a chak zawk hi table-a hmahruaitu tur a ni.
Friendly match a nih miau avangin nomawi aiin season thar atana an inpuahchahna lai chu an dah pawimawhh hmasak tur a ni a, Rasmus Hojlund-a'n tan Ruben Amorim hmin theihna hun ṭha a ni thei ang. Chutihrualin Man United hian striker an la zawng ve reng a, Benjamin Sesko nen an sawizawm mek.
United beisei Sesko
Benjamin Sesko hi kum 22 mi a ni a, Red Bull Salzburg aṭanga bul ṭanin RB Leipzig tan a khel mek. Slovenian striker hian ram tan match 41 khel tawhin goal 16 a khung tawh a, 6ft 5in-a sang striker hian theihna sang tak a nei tih a lang.
Bundesliga-ah season khatah match 34 khelh tur a awm a, Sesko hian season hnih chhungin match 31 leh 33 a khel a, goal 14 leh 13 khungin record a nei ṭha viau. Sesko hi Arsenal nen pawh sawizawm a ni a, London club hian Viktor Gyokeres an thlang ta zawk.
Man United hian Sesko hi an hmachhawp leh an sum pek theih angte an hrilh chiang tawh a, Slovenian striker hian Newcastle United nen a buk mek. Magpies pawhin Alexander Isak an chan hmel avangin Sesko lak tumin theihtawp an chhuah a, Man United aiin sum theh chhuah tur an ngah zawk dawn.
Khawtlang media te chuan Sesko hian Magpies ai chuan Man United a thlang zawk tih an sawi a, mahse hei erawh thuthang ang chauh a la ni. Ruben Amorim-a hote hi season liam ta khan 15-naah an awm chauh a, player an hip vak lo. Season tharah Europe inelna an khelh dawn loh avangin Sesko an lak chuan chanchin lawmawm a ni ang.
Mbeumo la awl dawn
Manchester United-in Brentford aṭanga an lakluh Bryan Mbeumo khelh hun an nghakhlel a, an la nghah leh rih hret a ngaih a rinawm. Cameroon international hi US-ah zin mah se Amorim-a'n match hmasa pahnihah chhawr a tum lo a, Everton an hmachhawn huna inlan tura ngaih a ni.
Hammers an sawp ṭumin Bruno Fernandes-a'n goal hnih a khung a, United captain hian hmun pawimawh a chan leh a rinawm. Wing back-ah January thlaa an lakluh Patrick Dorgu a chak ṭha viau a, Amad Diallo pawh forward aiin wing back-ah a rintlak zawk dawn niin a lang.
Amorim-a'n a formation hman thiam 3-4-2-1 a hmang zel a, player tan chuan manager duh dana khelh theih a ṭul dawn. Player thar Matheus Cunha-a'n match hmasa berah ball a keng thei tih a lantir a, Cherries lakah goal khung tel a tum ang.
Bournemouth-in defender Dean Huijsen leh left back Milos Kerkez te an chan a, chutichung chuan Philip Billing, Dango Ouattara leh Daniel Adu-Adjei te goal hmangin Everton 3-0 in an sawp. Premier League Summer Series-ah Man United, Bournemouth, West Ham leh Everton te an inel a, point inang a awm chuan goal difference en tur a ni a, chumi zawhah goal khung zat, an la intluk zel chuan head to head en chauh tur a ni. Cherries hian match hmasa bera goal thum an khung avangin table chung bera awm turin an dinhmun a ṭha.