Hma kan sawn a ngai tawh hle - Leclerc

Ferrari driver Charles Leclerc chuan hma an sawn a ngai tawh takzet tih a sawi a, Formula 1 season kal laiah McLaren car an um phak loh avangin an tan champion a harsa dawn niin a lang.

F1 intlansiak an neih hnuhnung ber Belgian Grand Prix-ah Leclerc hi pathumna a ni, a hmaah hian McLaren driver pahnih Oscar Piastri leh Lando Norris te an thleng a, dawhsan a lawn phak chin nih kha thil lawmawm chu a ni tho.

Leclerc chuan, "Hma kan sawn theih nan kawng hrang hrangin hma kan la a, ṭhenkhat a hlawhtlin viau laiin ṭhenkhat erawhin beisei a phak vek bik lo. Engtiang takin nge hmasawnna hi kalpui tur a nih pawh sawi thiam a harsa hle.

"Hmasawnna hi vawi leh khata tih huk a nih chuan a nghet tawk lo ṭhin, chuvangin dawhthei taka kan nghah a ngai. Inelna kan neih apiang hian zirchhuah tur kan nei tel zel a, tun ṭumah pawh khan duhthusam ang thlap ni lo mah se lawmna tur a awm.

"Kan elpui team dangte hi an ṭha hlawm em em a, chuvangin anni el phak tur chuan tuna kan dinhmun aṭang hian hmasawn kan ngai tih chu zep theih a ni lo, intlansiak kan neih lehpekah chuan Belgian GP aia tlan ṭhat zawk kan tum dawn a ni," tiin a sawi.

Belgian GP-ah khan Ferrari driver pakhat zawk Lewis Hamilton chu pasarihna a ni a, world champion vawi sarih ni tawh hian beiseina sang tak nen tun season aṭangin car sen khalh mah se chak ni hmel a la hmu thei rih lo.

British star Hamilton hian Mercedes chhuahsanin Ferrari hi a zawm a, champion tam lama Michael Schumacher nen record inṭawm (7 titles) an neih mek chu kalsan a tum, mahse a tum leh beisei angin thil a la thleng thei rih lo a ni.

August 3, Pathianni zan dar 6:30 hian Hungaroring-ah Hungarian Grand Prix an tlan leh dawn a, khawvela car intlansiakna sang ber hian season chawhnu lam an hmang chho mek a ni.