Sunderland leh Xhaka an inrem

Premier League kai thar Sunderland chuan midfielder Granit Xhaka an la lut dawn tih a chiang ta, pound maktaduai 13 man a ni ang a, a khelh ṭhat dan a zirin pound maktaduai li pek belh leh theih tura tih a ni bawk.

Xhaka hian kar hmasa khan a club Bayer Leverkusen hnenah chhuah a duh thu a lo hrilh tawh a, kum 32 mi midfielder hian Stadium of Light-ah kum thum daih contract a ziak ang, chanchinbu i chhiar meuh chuan inremna an ziak fel tawh hial ang.

Swiss international Xhaka hian Premier League-ah tawnhriat a nei ṭha, tun hmain Arsenal tan season sarih chhung hun a lo hmang tawh; Gunners aṭangin Leverkusen a zawm a, coach Xabi Alonso kaihhruaina hnuaiah Bundesliga champion an ni hial.

Arsenal tan match 297 a khelhsak hman a, vanglai hun a hmanna a ni - a tan English football chu thil thar a ni tawh dawn lo; Sunderland tan tawnhriat nei ṭha lak theih hi thil lawmawm a ni ang.

Tun nipui bazar chhungin Sunderland hian player lakluh nan pound maktaduai 114 an hmng tling dawn ta, mahse an player pahnih Jobe Bellingham leh Tommy Watson te an hralhna aṭangin pound maktaduai 37 an hmu let thung a ni.

Xhaka hma hian - Enzo Le Fee, Habib Diarra, Noah Sadiki, Reinildo Mandava, Chemsdine Talbi leh Simon Adingra te an la lut tawh a, player dang an lak belh leh a nih pawhin a mak lo ang.