Nadal-a thurawn latu Zverev

Alexander Zverev chuan Rafael Nadal leh a coach ni ṭhin Toni Nadal hnen aṭangin thurawn a la a, world number 3 Zverev hian Canadian Open a khel dawn a, result neih ṭhat phah ngei pawh a tum ang.

German tlangval Zverev hi player ṭha tak ni mah se Grand Slam nomawi a la chawi thei lo a, hmanni lawka khelh zawh tak Wimbledon-ah pawh khan hneh nei loin a tla; tunah US Open khel turin a inbuatsaih chho leh mek.

Zverev chuan, "Toni hi coach ṭha tak a ni a, amah leh Rafa te hnen aṭangin fuihna thu ṭha tak tak ka dawng a, ka chhinchhiah reng ang. Hun rei tak chhung kan titi ho a, a bik takin Rafa hi min hrechiangtu a nih avangin min hrilh hnem.

"Kan inhmachhawn hman a, mual sir aṭangin ka inkhel entu zingah a tel ṭhin bawk. Chuvangin ka ṭhatna leh ṭhat tawk lohna lai a hrechiang em em a, theih ni se la chuan hun rei zawk hman duh pawh a châkawm ka ti hle," tiin a sawi.

Toni Nadal chungchang sawi zuiin Zverev chuan, "Ni 10 chhung ka chamchilh a, a hlawkthlak takzet. Tun hmain Rafa a lo enkawl tawh ṭhin a, ani nen chuan khaikhin chi kan ni lo tih hre mah ila, a kaihhruaina hnuaiah chuan player ṭha lehzual zawk ka nih theih ka beisei," a ti.

Zverev hian coach atan Toni hi a duh a, mahse thu chiang a la awm lo thung. Vanglai hmang mek a ni a, a kum rualpui leh amah aia naupang zawkten nomawi lian tham an chawi ta fo, a insiamṭha thuai a nih loh chuan a tan hun ṭha a liam ve thei dawn a ni.