Sunderland-ah Xhaka a chiang ta

Premier League kai thar Sunderland chuan Bundesliga club Bayer Leverkusen aṭangin Granit Xhaka an la lut ta a, kum thum atan Swiss midfielder hian contract a ziak.

Black Cats hian Xhaka la lut tur hian pound maktaduai 13.4 vel an inseng nia sawi a ni a, Saudi Pro League club-te nen pawh sawi zawm ni mah se, Xhaka hian Premier League-a kir a thlang zawk a ni.

Xhaka hi English football-ah a mikhual lo - Arsenal tan kum sarih zet a lo khel tawh a, Germany a pan hnuah Leverkusen tan Bundesliga leh DFB-Pokal nomawi chawiin, a hming a chher thar leh hle.

Kum 32 mi midfielder chuan, "Black Cats ka zawm thei hi ka lawm hle. Club nena indawrna kan neih khan an phurzia ka hmu a, he club chhungkua, fans leh player te rilru puthmang thlengin ka hrethiam nghal a, min tiphur hle a ni," a ti.

Xhaka chuan sawi zawmin, "He club-ah hian ka duh ang tak ka hmu a, hlauhthawnna ka nei lo. Sunderland hian an phu ang takin top flight league an khel leh dawn a, thawnthu thar ziah kan duh a ni.

"Ka tawnhriat mai piah lamah, ka thiamna hmangin he team hi ka puih theih ka beisei," a ti a, Sunderland-ah a tikimtu nih a tum lo - Switzerland international hian Arsenal tan number 34 a ha ang.