Police khingpui tur Ramhlun North

31st July, 2025

I Day Football 2025-ah Mizoram Police-in an match hmasa berah SYS FC 1-0 in an hneh a, vawiin tlai dar 3:00 hian Ramhlun North nen RG Stadium, Mualpuiah an inkhel leh ang. Lalbiaksanga Colney kaihhruai Police tan vawiin hi quarterfinal luh theihna hun ṭha a ni a, Ramhlun North tan knockout luh beiseina nei turin point hmuh a ngai thung.

MFA buasaih I Day Football-ah hian NorthEast United an tel theih tak loh avangin team 11 chauh an tel a, group pathumah ṭhen hran an ni. Group A-ah Mizoram Police, Ramhlun North, SYS FC leh Kanan FC te a awm a; August 1, Zirtawpni chhun dar 12:00 hian SYS FC leh Kanan FC te an inkhel ang. Team li aṭangin team pathumin quarterfinal an lut dawn.

Champion lai Police

Nikum I Day Football-ah Mizoram Police-in final-ah Aizawl FC hnehin nomawi an chawi a, tun ṭum inelnaah pawh Lalbiaksanga Colney hote hi champion rinkai zingah an tel pha. Chutihrualin kumin inelna danglamna chu team an intluk tlang hlawm a, ṭha fal an awm loh avangin champion tur pawh rin thiam a la har hle.

Police hian match hmasa berah SYS FC chu 1-0 in an hneh a, BS-a Colney hote tan inchhuanna tur a awm lo. Chutihrualin Police hian chance ṭha erawh an hlah ngei a, goal khungtu Biaktea pawhin chance ṭha dang a hlah a, Lalbiakhlua (Hlutea) pawhin crossbar a pet per.

BS-a Colney hote hian tawnhriat neih ṭhat avangin khelh an harsat a, knockout inelnaah an tlo ṭhin viau bawk. Police hian volleyball star Vanlalṭanchhana (Valbuanga) chu player angin an ziak lut a, match hmasa berah pawh a inlan. Vawiin lamah minute tam zawk nei tura beisei a ni.

Ramhlun North hi

I Day Football-ah hian MPL club pariat bakah ADFA First Division club pahnih leh FIFA AIFF Talent Academy te an inel. Police khingpui tur Ramhlun North hi First Division club an ni a, training-na hun an ngah tawk lo bawk nen match hmasa berah Kanan FC an pha lo deuh.

Chutihrualin Ramhlun North hi MPL-a tawnhriat nei ṭha Lalrindika Hmar enkawl a ni a; MPL-ah pawh player vantlang chunglam ni thei tur Vanlalthanga leh Peter Lalrinhlua te an kawl. Rindika'n Kanan an hmachhawn ṭuma a tihsual lai a siam dik thei a nih ngat chuan Police tan point thum hmuh a harsa ang.