Zo Clasico-ah Chhinga 'Chanmari' an chak

I Day Football 2025 group stage-a inkhel en châkawm berah Chanmari FC-in Dinthar FC 2-0 in an hneh a, Zo Clasico-ah PC Rosangzuala leh Lalruatsanga ten goal an khung. Rochhingpuia'n Chanmari head coach hna ṭum hnih a chelhnaa a match hmasa berah hnehna a chang a, an hneh hi an elpui Dinthar FC an nih avangin an result-ah a lawm lehzual ang.

Nimin Inkhelah Chanmari FC-in bul an ṭan ṭha a, minute hnihna lekah Malsawmsanga penalty hlawhchhuah chu PC Rosangzuala'n goal-ah a chantir. Laldampuia kaihhruai Maimawms-in ṭan thut lu hai an neih an tuar a, an khingpui Chanmari FC erawh kum 10 chuang a ral meuh chuan I League an khelh tawh avangin an tho chhuak thei ta lo.

Chanmari FC-in inkhel an thunun hrim hrim a, I League an khelh theihna atana player pawimawh Joel Lalramengmawia, Michael Lalbiaksanga leh Sawmsanga te hmangin inkhel an thunun a; ISL club Hyderabad aṭanga an lakluh Aron Vanlalrinchhana mual sir lamah a nung ṭha viau bawk.

MPL hmasa bera Dinthar champion puitu R. Laldanmawia a club hluiah kir mah se second half-ah hnawhchhuah a ni a, Sialhawk Express hi Tuithiang nen an inkhelh hunah a inlan thei lo ang. Maimawms-in hun tawp lam player 10-a an khelh avangin an tho chhuak thei lo a, bench aṭanga rawn lut MS Dawngliana pawhin Dinthar lawmna a siam thei ta lo.

Chanmariin inkhel thunun mah se goal hnihna an khung lawk lo a, minute 90-naah Joel-a ball pek chu Serchhip tlangval Lalruatsanga'n um lutin ṭha takin a pet lut a, Dinthar goalkeeper Joel B. Lalramchhana'n a chhut sual. Chhinga hoten an group-a an elpui tur bera ngaih Dinthar an hneh a, chhiarkawp danin la lut chiah lo mah se quarterfinal an lut ngei turah a ngaih theih.