Aizawl FC-in MLS hnehin bul an ṭan

I Day Football-ah Aizawl FC chuan nimin khan MLS FC chu 1-0 in an hneh a, goal awmchhun hi Lalhriatpuia'n a khung. Group B-ah hian team pathum chauh an awm a; Aizawl FC, MLS leh Saikhamakawn te an awm a, MPL club vek niin team pahnih chauhin quarterfinal an luh dawn avangin team ṭha pakhat an tla ang.

I League club coach R. Lalruatfela'n an player thar lakluh defender Rohmingthanga leh Eric Remruatpuia te bul a ṭantir nghal a, Aizawl FC-in I League-a tawnhriat nei keeper Vanlalhriatpuia, Lalawmpuia Sailo, Laltlanzova, Lalrempuia leh Hriata te bul a ṭantir bawk.

Aizawl FC hming langsar zawk mah se MLS lamin goal venhim an ngaih pawimawh bawk avangin I League club-in goal an khung thei mai lo. Chutihrualin player ṭha danglamna a rawn lang a, Serchhip tlangval Eric-a ball pek chu minute 33-naah Farkawn tlangval Hriata'n ṭha zetin a pet goal.

Hriata hian nikum January khan Aizawl FC a zawm a, Chanmari FC leh Electric Veng FC tana khel tawh striker hian hma a sawn hle. May thla tawp khan Champhai District Inter Village Football Tournament-ah Farkawn a champion pui a, Hriata hi best player a thlan a ni.

Aizawl FC-in goal an khung belh thei lo a, MLS lamin goal an mamawh tih hriain an nawr let ve tho a, first half-ah pawh M. Lalpektluanga'n hnai tak aṭangin a khung lo. AFC-in reserve team aṭanga an sawn chhoh Isak Lalvenhima a thawkrim a, player of the match-a thlan a ni hial.

Second half-ah an nawr na sawt a, chutihrualin AFC goal bawh a na ve tho. OmOm-a'n goal ban a pet per a, Malsawmzuala Tlangte cross shot pawh Vincent Lalduhawma'n khawih fuh na tawk loin goal ban a per. Chutihrualin MLS lamin hun tawp thlengin chance an nei a, injury time-ah Khaiminthang freekick pet chu AFC keeper Hriatpuia'n a dang a, I League club-in point thum hlu tak an hlawh chhuak.

MLS coach R. Vanlalpeka chuan, "Lawngtlai leh Lunglei vela kan khelh chhuah theih ang khan RG Stadium-ah kan la khel thei lo a, kan rilru put hmang kan siam ṭhat a ngai. Kan khelh tam chuan kan rilru put hmang pawh a dik chho turah ngai ila, chutihrualin chak lo mah ila kan khelh danah lawmna tur ka hmu nual a ni," tiin Vanglaini a hrilh.