Silly Point: The Oval fiahna
Nikir Thla ni 7 tuka Virat Kohli leh Rohit Sharma te tel loh hnuah India team hmel thar Shubman Gill leh a hoten, Heathrow, London-a lei an rah aṭang khan thla hnih kan lo pumhlum ṭep ta mai a.
Match nga awmna Test Series khelh hi chuan fuat a mamawh a, players zawng zawng te nun leh career a ṭha zawng emaw a lawmawm vak lo zawnga thlak danglamtu a ni ṭthin. Tun ṭumah pawh hian a ni bang chuang lo e.
Series khar nan leh India-in Anderson-Tendulkar hi England kuta hlan mai lo a, in thei sem pui an tum a nih chuan chak a ngai a. England tan nomawi kawl turin draw a tawk thung. US President Pisa The Oval ni loin, Cricket khelmual hlun The Oval, London fiahna diktak a ni dawn e.
Êng a chuai ṭan
Tun ang nipui lai chuan England ramah chuan khaw en hun chhung khu a rei em em mai a. Zing dar 3:00 velah kawl êng ṭanin, zan dar 10 velah khua a thim leh chauh ṭhin. Amaherawhchu mikhual India team te chakna êng a chuai ṭan? A bik takin a ball vawm department chu a tawp thleng zo chhiar tham lek an awm ta.
Old Trafford lama England ho ball vuak laklawh laia ball vawm chhunzawm ta miah lo Jasprit Bumrah chu khuarei zawk thlirin ṭum thum bak inlan tir loh an tumna chu an hman ngei ngei a ngaih tak hmel a. A aiah Edgbaston-a hero, Lord's lama zero leh si Akash Deep a rawn luh leh a ngai hmel a.
Inkhel zawng zawnga inlan vek Md Siraj-a'n tun series-ah over 139 a vawm tawh bawk a, ṭum khat na na na chu thatawpin ṭang leh thei tak maw? La inlan lo practice-na lama kut tikak palh Arshdeep Singh-a'n a test lukhum hmasa ber dawng turah ngai bawk ang.
Pace all rounder Shardul Thakur leh inhliam rawn hawng leh tawh Nitish Reddy te an ṭangkai vak lo tih a hriat tawh a, Spinner-te hlauhawm lutuk lohna England pitch-ah Ravindra Jadeja leh Washington Sunder ten a mawi hnai tawkin ball an vawm tho avang leh century vaw zo hlim ve ve an nih avangin batting all rounder angin an hman theih ang a, chumi avang chiah chuan Kuldeep Yadav hi specialist spinner anga a luh ngei ngei a ngai niin ka hria.
Mi vuak erawh kan thiam
Rishabh Pant inhliam avangin batting line up balance a khingbai ta deuh a dawn a. KL Rahul leh Yashasvi Jaiswal te bul ṭan tua awm lehin, Sai Sudharsan, Shubman Gill leh wicket keeper Dhruv Jurel te middle order ah lutin, no 6 leh 7 a tan Jadeja leh Washington Sunder te hi an rin ngam ang em tih lai tak hi zawhna lian tak a ni ta a ni?
Hei hian India top order te nasa takin an kokiah mawhphurna a hlan belh dawn a, a fuh loh vaih chuan India batting line up tawi leh mei sei tak a nih ber ṭum a ni dawn a, a vawmtu lam department erawh captain tan thlak kual zung zung tur, innghahna tlak ṭhiau mi paruk a nei dawn tihna a ni thung!
Captain Ropui? Batsman Ropui
Shubman Gill hi hruaitu ropui a nih leh nihloh chu hunin a hril dawn chauh. Series hnih khat team a enkawl atanga lo teh ngawt ka tum lo. Mahse a chanvo bik ball vuak lamah erawh batsman ropui huangah rinluh theih a ni der tawh chuan ka hria. Batsman ropui 2, Sir Donald Bradman an 1930 Ashes, Test 5 Series a run 974 a vuahchhuah hi chu lo dah tha ta ila, 1976 kuma helai England ram tho an tlawh tuma (4 test series) a Sir Vivian Richards an run 829 a vuakchhuah leh Australian Mark Taylor an 1989 kuma ( 6 test series) a he England ramah tho Ashes an khel tuma innings 11 a bat tuma run 839 an vuak chhuah te hi tuna run 722 siam tawh Hamara Desh Kaptan innings 2 la bat thei turah ngaih Shubman Gill hian, khum thei tak maw?
Thlengtu Branch lam
Ṭum li meuh, a ni tawp ni (ni 5-na) thleng veka inkhel hmuhnawm leh hahthlak min han hlui meuh chuan, England kaptan Ben Stokes pawh a taksa lamah insawiselna a nei ta neuh neuh mai a. English player zinga bowler hlauhawm ber a nih miau si avangin, mawhphurna a la lo thei si lo bawk a ni.
Hun rei tak inhliam lo let leh Jofra Archer hi a zawna tum thum inkhelh a tlin meuh ang em tih hi zawhna lian tak a ni bawk a. Tun series inkhela inlan vek, hlawhtling lutuk loa over 120 chuang ve ve vawm tawh Chris Woakes leh Brydon Carse te aiah ball vawm kawh Gus Atkinson leh tun Oval inkhel atana English selector-ten an telh thar pace allrounder Jamie Overtone te an rawn inlan a nih pawhin thil mak a ni lo ang. A khaikhawm nan, team pahnih ve ve bowling department lam an buai ru a ni e.
The Oval Pitch
England cricket khelmual zinga Department tin te tana hamthahna nei vek an tih ṭhin The Oval khelmual pitch hi a ni khatnaah pace bowler tan swing a awm ṭha a, ni hnihna chawhnu aṭanga a ni lina thleng a pitch a ball sawt hi a ṭhat avangin batting nawm lai ber a ni ṭhin a.
A ni tawpna ni ngana lamah hian spinner-te tan an ball ṭhuaite a sawt kawi ve ṭhin bawk. Ṭhumvawr chak captain hian a tlangpuiin vawm hmasak an thlang ṭhin reng a ni. Thlengtu branch England lamin draw pawn series nomawi an chawi dawn tih an hriat avangin pitch khirkhan lutuk an buatsaih loh turah ngai ila.
India kaptan Shubman Gill erawh a captaincy history-ah vawi khat mah thumvawrah a la vannei lo a, batting lam practice hrih loin, pawisa thir vawr hi ni khat tawp chu a zir a ngai zawk mai em te ka ti ta hnuhnawh.
