Match hmasa berah Zverev a chak

Alexander Zverev chuan beiseina sang tak nen Canada a pan a, inelna ngaihhlut zinga mi ATP Toronto Masters khelin a match hmasa berah hnehna a chang, thla khat chuang a inkhelh loh hnua inelna hmachhawn leh a nih avangin a tan a lawmawm ang.

Wimbledon khelh zawh takah Zverev hian hneh a nei lo - Grass court inelna liana a chak loh hian a nghawng na hle. Tun hnai khan Rafael Nadal leh a coach hlui Toni Nadal te hmu turin Spain-ah a zin hial a, hlawh thlak a tih thu pawh a sawi a ni.

Nimin zing inkhelah Zverev hian Adam Walton chu 7-6 (8/6), 6-3 in a hneh a, tennis a khelh hun chhungin vawi 499 tehmeuh hnehna a chang tling ta chiah; a match lehpekah chuan Matteo Arnaldi a tum leh ang, ani hian Tristan Schoolkate 6-3, 3-6, 6-3 in a hneh.

German tlangval Zverev chuan, "Inkhel ṭhenkhatah hi chuan hnehna chan hrim hrim a pawimawh chang a awm, engtiangin nge hnehna kan chan dan tih chu a pawimawh ber lo, khelh ṭhat vak loh lai pawha chak theih hi a pawimawh," tiin a sawi.

Inkhel dangah seeded pathumna Lorenzo Musetti leh seeded pangana Holger Rune te pawhin hnehna an chang. Musetti hian James Duckworth chu 7-5, 6-1 in a hneh. Rune pawhin Giovanni Mpetshi Perricard lakah 7-6 (9/7), 6-3 in hnehna a chang ve bawk.

Tualchhung tlangval Denis Shapovalov erawh a chak lo, an ramah a che chhe thei hle - Denis Shapovalov hi Learner Tien lakah 7-6 (7/4), 7-5 in a chak lo a, kum 2019 aṭang khan an ramah hian chak ni hmel a hmu thei lo.

Grand Slam pali zinga pathum - Australian Open, French Open leh Wimbledon an khel zo tawh, tun season atana khelh hmabak chu US Open chauh a ni tawh; hard court inelna lian atan tuna an tournament khelh lai pawh hi inbuatsaihna a ni nghal.

US Open hi August 25 aṭanga September 7 chhungin New York khawpuiah an khel leh dawn a ni.