Gyokeres-a jersey hralh a kal

Arsenal striker thar Viktor Gyokeres chuan lawm a hlawh hle a, match a khelh hma aṭangin Gunners chuan an hlawkpui tawh hle - tunlai hian Arsenal player zingah jersey hralh kal ber a ni mek.

Sporting Lisbon aṭangin Gyokeres hian Arsenal a zawm a, season thar inbuatsaihna an neihna lamah team a zawm nghal - Singapore National Stadium-ah pho chhuah a ni a, mipui lawm a hlawh takzet, a jersey ang hak duhtu pawh an tam.

Sweden international hian a duhthusamah chuan jersey number 9 hak a duh, mahse number 9 chu Gabriel Jesus-a hak lai a ni a, chhuhsak ngawt a rem lo. Chuvangin, club tana goal khung tam ber Thierry Henry-a hak ṭhin jersey number 14 a ha ta zawk.

Gyokeres awm hma kha chuan Arsenal player zingah Bukayo Saka, Declan Rice leh Martin Odegaard te jersey kha hralh kal a ni ṭhin a, tunah chuan an striker thar Gyokeres hian a luahlan vek rih a, match a khelh hma aṭangin a tla na nghal hle.

Thawhlehni aṭang khan Gyokeres hian team training pangngai a zawm thei tawh, vawiin tlaia Tottenham Hotspur nen an inkhelh hunah a inlan a nih pawhin a mak lo ang, hun pumpui khel tur erawh chuan beisei chi a la ni lo ang.

Mikel Arteta enkawl Arsenal hi season thar inbuatsaihin Asia khawmualpuiah an awm mek. Vawiin tlai dar 5:00 hian Kai Tak Sports Park, Hong Kong-ah Tottenham Hotspur nen an inkhel dawn a ni.

Arsenal Asia Tour 2025

Goalkeepers: David Raya, Kepa Arrizabalaga, Tommy Setford, Alexei Rojas-Fedorushchenko.

Defenders: William Saliba, Ben White, Gabriel Magalhaes, Jurrien Timber, Jakub Kiwior, Oleksandr Zinchenko, Riccardo Calafiori, Myles Lewis-Skelly, Josh Nichols, Marli Salmon, Cristhian Mosquera.

Midfielders: Martin Odegaard, Christian Norgaard, Mikel Merino, Sambi Lokonga, Martin Zubimendi, Declan Rice, Louie Copley.

Forwards: Bukayo Saka, Gabriel Martinelli, Leandro Trossard, Ethan Nwaneri, Reiss Nelson, Kai Havertz, Ismeal Kabia, Max Dowman, Andre Harriman-Annous, Viktor Gyokeres.