Manchester City-ah Trafford a kir

Goalkeeper James Trafford chuan Burnley aṭangin a inzir chhuahna Manchester City a zawm leh ta a, khawthlang chanchinbu rintlak ṭhenkhat chuan British goalkeeper zinga man tam ber niin an sawi.

Man City sawi dan chuan Trafford hi pound maktaduai 27 man a ni a, mahse Burnley lam chuan a man pun leh theihna tur nena chhut chuan pound maktaduai 31-in an hralh niin an sawi thung.

English goalkeeper zinga man tam ber chu Jordan Pickford niin kum 2017 khan Sunderland aṭangin Everton a zawm, a man zat chu pound maktaduai 30 a ni; Burnley sawi dan nena khaikhin chuan Pickford-a man hi Trafford hian a rawn khum ta chiah.

Kum 22 mi Trafford hi Man City aṭanga inzir chhuak a ni a, kum 2013 July khan Clarets hi pound maktaduai 19-in a zawm, a intuaihriam hnuah a club ngaiah bawk a kir leh a, a tan chona lian tak a ni ngei ang.

Season hmasa khan Scott Parker enkawlna hnuaiah Trafford hian hmun pawimawh a chang. Championship match 45 a khelh zinga 29 laiah goal a chhuah lo, a club hi Premier League khel turin a tlinpui hial a ni.

Trafford chuan, "Manchester City ka zawm leh thei hi kei leh ka chhungte tan chuan a lawmawm hle, tun hma lama hun ka lo hman tawhna leh tlangnel tawhna a nih avangin a phurawm zual, ka chhuahsan laia ka thiamna leh tuna ka dinhmun chu a inthlau tawh hle," a ti.

Man City Director of football Hugo Viana chuan, "James hi English goalkeeper chhuak thar zingah chuan hmabak nei êng leh ṭha berte zinga mi a ni a, kan mamawh chhanna pawh a nih theih ngei kan beisei," tiin a sawi.

Pep Guardiola enkawl Man City hian Ederson, Stefan Ortega leh Marcus Bettinelli te an nei sa, player thar Trossard tan hmun nghet chan nghal mai chu thil awlsam a ni lo ang, chutihrualin Ederson hma hun a chiang rih lo a, rinrawl nih theihna kawng a inhawng ve bawk.

Ederson hian a contract neih lai a hmang zo hnai, season khat daih chauh inremna an nei tawh. Galatasaray pan tur anga sawi a awm a, mahse tun hnai khan a chungchanga thuthang chu 99% a dik lo tih a sawi thung.