Third round-ah Gauff a lut

WTA Canadian Open khelh laiah Coco Gauff chuan second round a paltlang - US nula hian Danielle Collins 7-5, 4-6, 7-6 (7/2) in a hneh a, inkhel inhnehtawk leh hmuhnawm takah a vannei zawk a ni.

US Open inbutsaihna inkhelah Gauff hi awlsam takin a chak mai bik lo, a tawp lamah erawh point hnuhnung paruk ngawt hmuin a chak zawkah a ṭang, a match lehpekah chuan Veronika Kudermetova a hmachhawn leh ang, inkhel dangah ani hian Olga Danilovic 6-4, 6-2 in a hneh ve thung.

French Open champion lai Gauff chuan, "Ka inbuatsaih ṭha hle a, mahse match pangngai kha ka khel ṭha lo hle thung. Khatiang tak maia ka inbuatsaih dan lo lutuka ka khel kha a mak pawh ka ti zawk hial.

"Mahse, match lehpekah chuan tun aia ṭha zawk khan ka khelh theih ka beisei a, a tawp thlengin ka tan tournament nuam leh hlimawm tak a nih theih ngei pawh ka beisei tlat a ni," tiin a sawi a, champion a tum ruh hle.

Kum 21 mi Gauff hian double fault ringawt pawh vawi 23 lai a nei, hetih lai hian ace chu vawi thum chiah a ni thung. Hnehna chang tur hian darkar hnih leh minute 55 lai a mamawh, match hautak tak a ni tih chu a chiang hle a ni.

Inkhel dangah Aoi Ito chuan seeded pasarihna Jasmine Paolini chu 2-6, 7-5, 7-6 (7/5) in a hneh - Japanese nula Aoi tan seeded pasarihna Paolini hneh hi chanchin ṭha leh lawmawm bik a ni ngei ang.

DC Open champion Leylah Fernandez erawh a chak lo, beiseina sang tak nen inlan mah se Australian player Maya Joint lakah 6-4, 6-1 in a chak lo. Washington Open pahnihna Anna Kalinskaya erawhin Ann Li chu 7-6 (8/6), 0-6, 6-3 in a hneh.

Seeded palina Mirra Andreeva chuan third round lut turin Bianca Andreescu a paltlang. Andreescu hi kerek hliam vangin a inkhel thei lo, inkhelh hah ngai loin round sang zawk a luh theih phah a ni.