Chanmari FC leh Dinthar FC an chak nuam sa

I Day Football-ah MPL club an chungnung a, group C-ah Chanmari FC-in India rawlthar ṭha rual awm khawmna FIFA AIFF Talent Academy 6-1 in an sawp a, inkhel dangah Dinthar FC-in First Division club Tuithiang FC 5-1 in an hneh. Group C aṭangin team pathumin quarterfinal luh beiseina an nei a, chhiarkawp danah chuan Chanmari FC chauhin knockout stage an la lut.

Chanmari an ṭha

I League club Chanmari FC-in FIFA AIFF Talent Academy lakah team ṭha an nihzia an pholang a, 6-1 ngawtin an chak. AIFF Talent Academy pawhin hahdamna hun an nei tawh a, Tuithiang nena an khelh ṭum ngaihtuah chuan hma an sawn takzet. Mahse, kum 15 rual leh I League club chu an la inthlau deuh.

Minute sarihna lekah Chanmari tan Republic Veng tlangval pahnih an lang a, Zirtea corner pet chu Laltluangliana'n tauh ṭha tawk lo mah se Chanmari right back hian a ke vei lamhin nalh zetin a volley lut. Minute 37-naah dinglam aṭanga Tluangliana'n ball cross duhthusam chu PC Rosangzuala'n a tauh lut.

First half-ah 2-0 chauhin Chanmariin hma an hruai a, second half ṭan chiahah Malsawmsanga pass chu PC-a'n a khung lehnghal. Cherhlun tlangval Aron Vanlalrinchhana'n minute 56-naah AIFF Academy tlarhnung bumin Chanmari tana a goal hmasa ber a khung leh bawk.

AIFF Talent Academy-in minute 61-naah R. Lalremruatfela hmangin tun inelnaa a goal hmasa ber a khung a, Mualṭhuam North rawlthar goal khung hi goal ṭha bik a ni a, Chanmari keeper Zothanmawia tan pawh dan ngaihna a awm lo. Inkhel thuntu Chanmariin substitute Lalruatsanga hmangin an khung belh a, Serchhip tlangval hi a chak ṭhat bakah a finishing a ṭha tel.

Minute 90-naah Tluangliana bawk a rawn inlar a, a tlan chakzia hi chu a lantir fo tawh a, AIFF Academy lakah a tlan chakna chauh ni loin a ball pet thiamna a pho chhuak. Chanmari right back hian striker finishing ṭha ang maiin thui tak a tlan hnuah kawh zetin a pet lut a, I League club 6-1 in an chak.

Hei le, Dinthar chu

Zo Clasico-ah Dinthar an khel ṭha tawk lo a, Tuithiang FC lakah erawh Laldampuia Tochhawng hote an chungnung a, an phu ang ngeiin 5-1 in an chak. Tuithiang defender fimkhur tawk loh avangin box chhungah a kutin ball a dang a, Dintharin penalty an hmu a, minute 10-naah MS Dawngliana'n club thar tana a goal hmasa ber a khung.

Minute 17-naah handball vang thoin Dintharin penalty an hmu a, Ricky Lalramnghaka'n goal-ah a chantir. Maimawms an phur chhunzawm a, box pawn aṭanga Ricky-a ball pet chu keeper Zolawma'n dang thei loin a per chu Jerry Lalchhanchhuaha'n a khung.

Dintharin freekick an hmang ṭangkai a, mintue 32-naah Lalremtluanga (Mamatea) ball vawrhluh chu a kang laiin Ricky-a'n a khung a, goal hnih khungtu hi player of the match-a thlan niin first half-ah Dintharin 4-0 in hma an hruai.

Second half-ah Tuithiangin Lalrinpuia hmangin rawn khung mah se Dintharin Samuel Lawmsiamkima hmangin goal ngana an khung. Maimawms-in tualchhung football-ah tawnhriat an nei ṭha a, Tuithiang 5-1 a an sawp hian team chhungah phurna nasa tak an neih phah ngei ang.