MBA Junior Official: Mama leh Rinhlui langsar

Yonex-Sunrise MBA Junior Official Championship 2025 chu neih zawh a ni ta a, kar hmasa lawka MBA senior Official Championship-a player langsar Malsawmhlua (Mama) leh H. Lalrinhlui te bawk an langsar nawn.

Mama hi category pathum a telnaah a champion vek a, Rinhlui'n pahnihah inelna hmachhawnin gold a la ve ve bawk - inelna hi NEXA-in an sponsor niin, Mizoram State Sports Council Golden Jubilee lawmna chi khat a ni bawk.

July 29 aṭanga neih ṭan inelna hi August 1 khan an zo a, Mizoram Badminton Centre, Zuangtuiah neih niin, category hrang hrang 16-ah an inel - player 185 an tel a, entry 235 lutin, match 232 khelh a ni.

Aw Mama!

Serchhip rawlthar Mama'n New Serchhip BC hmingin inelna a hmachhawn a, Under-19 boy's singles, U19 boy's doubles leh U17 singles-ah te gold a la fai vek!

Mama hian U19 singles-ah senior official final-a a hneh loh tak Vanlalmawlsawmzuala lakah phuba a la a, 18-21, 21-9, 21-10 a hnehna changin gold medal a hlawh chhuak.

New Serchhip BC tan thoa khel Sawma nen hian U19 doubles-ah ṭang dunin, gold an la a, U17 singles-ah Joel Lalramdinmawia chu straight set-in a hneh bawk - Mama hian MBA Senior leh Junior inelnaah gold medal pathum, silver leh bronze medal pakhat ve ve a vaw chhuak a ni.

Hlui, i hlu

Chanmari West tleirawl duhawm H. Lalrinhlui'n badminton khawvela hmabak a neih ênzia a pholan chhunzawm zel a, U19 & U17 singles-ah te inlanin, gold medal a hlawh chhuak ve ve.

Rinhlui hian U19 singles final-ah hian senior championship final-a a hneh tak, Sihphir BC tana inlan Tirza Lalremruati a hneh nawn a, U17 singles-ah PGBA lama badminton a zirpui, player ṭha leh hrohrang na Zoramthari a hneh zui.

Tun kar hnih chhunga MBA tournament lian pahnihah Rinhlui'n gold medal pali a la a, silver medal pakhat a hlap chhuak bawk.

A hming Tirza

Kum 13 mi lek ni chungin Tirza-i pawh a lansarh chhunzawm zel. Kolasib naupang hian senior final-a a ngam loh hnu Rinhlui chu U19 singles final-ah ngam lo mah se, U15 girls singles-ah gold a hlawh chhuak a ni.

Hetihlai hian New Serchhip BC shuttler Lalṭhakimi chuan U13 girls singles leh doubles-ah gold a hlawh chhuak ve ve a, U13 doubles-a a ṭanpui, Lalruatkimi chu U11 singles-ah champion ve bawkin, gold pahnih a hlawh ve bawk.

Lunglei district lam pawh an reh vang vang hnuah, MBA tournament liana champion thei an rawn nei thar a, Zohnuai Badminton Club (ZHBC) tana inlan Edward C. Lalruatsanga chu U11 singles-ah a champion.