Quarterfinal-ah Zverev leh Popyrin an lut

Alexander Zverev chuan Canadian Open 2025 quarterfinal a lut, a hmabak chu champion lai Alexei Popyrin a ni ang - zanina semifinal luh an inchuh tur hi a hmuhnawm khawp ang.

Nimin zing Centre Court-a inkhelah, seeded pakhatna Zverev tan harsatna lian tham a awm lo - set khat an khel zo a, set hnihna an khelh ṭan leh chauh tihah a khingpui Francisco Cerundolo chu a hliam avangin 6-4, 1-0 in a chak.

Argentina tlangval Cerundolo hi a dul na vangin enkawl lailawk a ngai a, inkhelh chhunzawm tum viau mah se a khel zui thei lo. Court-ah damdawi thiam ten an buaipui hnuah a inhnukdawk zui ta a ni.

Inkhel dangah Popyrin chuan seeded pakuana Holger Rune chu 4-6, 6-2, 6-3 in a hneh. A khingpui tur Zverev hian Canadian Open vawi sarih a khelh zinga pangaah quarterfinal a lut thei a, hmachhawn awlsam a ni dawn lo.

German tlangval Zverev chuan, "Cerundolo kha ka tawrhpui hle, hliam vanga match khelh zawh theih loh hrehawmzia leh a nghawng hi chu ka hrechiang. Mimal takin kan inhre ṭha bawk a, dam ṭha leh vat turin duhsakna ka hlan bawk," a ti.

World number 3 Zverev chuan sawi zawmin, "Hmabak hlen tur ka la nei, tunah hian player ṭha hlir kan hmachhawn a, ka tan chuan match zawng zawngah theihtawp takmeuh chhuah a ngai," tiin a sawi.

Canadian Open inkhel dangah Karen Khachanov pawhin a kum zawna quarterfinal a thlenna ni turin Casper Ruud 6-4, 7-5 in a hneh; Khachanov hmachhawn leh tur chu Alex Michelsen a ni dawn, ani hian Learner Tien chu 6-3, 6-3 in a hneh ve bawk.

Wimbledon quarterfinal-a a chak loh hnuah Khachanov hian tournament a khelh lehna hmasa ber a ni. World number 16 Khachanov chuan, "Ka khingpui khan service a nei ṭha em em a, a bik takin a service hmasa zawk kha hmachhawn harsa ka ti hle," a ti.