Gauff hnehtu Victoria Mboko

Tennis inelna Canadian Open khelh laiah Victoria Mboko chuan seeded pakhatna Coco Gauff hnehin quarterfinal a lut a, semifinal lut tur chuan Jessica Bouzas Maneiro a paltlang leh a ngai dawn a ni.

Kum 18 mi Mboko hi wildcard hmanga inlan a ni a, tualchhung nula a nih avangin an duhsak - a laka beisei an nei ang ngeiin a khel chhuak. Darkar khat leh minute hnih chhungin Gauff hi 6-1, 6-4 in a hneh.

Mboko hian ama service a hum thei hle, hei bakah hian a khingpui service chhuhsak theihna remchang vawi nga a hmuh zinga pali a ti hlawhtling thei a, a phung ang ngeiin hnehna a chang.

Canadian nula Mboko chuan, "Player ṭha hmachhawn hi ka tan chuan thil thar a ni a, a hmuna inkhel entu tam tak hmaa inkhelh ringawt pawh a awlsam lo, ka tan chuan hetiang match hi chu tawnhriat ṭha tak a ni," tiin a sawi.

Grand Slam vawi hnih champion tawh Gauff erawhin beisei a phak thei rih lo, a service ṭha lo leh tihsual a ngah lutuk chu a tuar zel. Mboko lakah pawh vawi ruk ngawt double falut a nei - a match hnuhnung pathumah double fault vawi 43 tehmeuh a nei hial.

Gauff ang bawkin Emma Raducanu pawh a chak lo - British nula hian Wimbledon finalist Amanda Anisimova chu 6-2, 6-1 in a ngam lo. Anisimova hian vawi 29 tehmeuh winners a hlah chhuah laiin a khingpui hian vawi nga bak a vaw chhuak ve thei lo.

Inkhel dangah Iga Swiatek erawh a chak - Polish nula hi seeded pahnihna pek a ni a, a khingpui Eva Lys chu 6-2, 6-2 in a hneh. Hun harsa a paltlang hnuah Swiatek a tho leh mek a, hard court inelna huangah pawh sulhnu a nei ṭha chho ta zel.

Tun hma lama Wimbledon champion pawh lo ni tawh Elena Rybakina chuan Dayana Yastremska 5-7, 6-2, 7-5 in a hneh a, quarterfinal-ah chuan Marta Kostyuk a tum leh ang. Kostyuk hian McCartney Kessler 5-7, 6-3, 6-3 in a lo hneh ve bawk.