Lionel Messi a inhliam

Inter Miami captain Lionel Messi chu nimin zinga Necaxa nen League Cup an khelh ṭumin a inhliam a, inkhel tluan thei loin khelmual aṭanga lak chhuah a ngai, a dinhmun chiang taka sawi theih a la ni lo thung.

Chase Stadium-a inkhelah Inter Miami hian Telasco Segovia hmangin goal an khung hmasa, mahse minute 17-naah Maximiliano Falcon hnawh chhuah niin an tlam zawk a, chawlhlawk hmain mikhual lamin Tomas Badaloni hmangin an sut.

Minute 81-naah Necaxa tan Ricardo Monreal chuan an goal hnihna khungin chak turin an dinhmun a ṭha hman hle, mahse hun tawp hma chiahin Jordi Alba chuan a sut a, penalty shooutout pet niin Miami hi 5-4 in an chak.

Inter Miami an chak a, captain Messi a inhliam vang erawhin an lawm a kim lo. Minute 11-na lekah Messi hi a malpui hliam vanga lak chhuah a ni a, defender pahnih ten an cheh kara talchhuah a tumna lamah a hliam.

Miami coach Javier Mascherano chuan, "Leo kha a inkhel zui thei lo, chu vanga la chhuak chu kan ni. Hliam a nei ngei mai a, engtiang taka na nge a nih erawh ka la sawi thei lo, a chawlh chen tur phei chu sawi theih a la ni lo," tiin a sawi.

Kum 38 mi Messi hi a vanglai a liam ve mek a, season hmasa pawh khan hliam vangin a lo buai tawh. Nakkuma khelh tur World Cup atan a inbuatsaih chho mek a ni a, hliam vanga a chawl rei a nih chuan a hma hun pawh a nghawng thei tawh a ni.