Paqueta leh Antonio dinhmun a inang lo

West Ham manager Graham Potter chuan a midfielder Lucas Paqueta chuan chhuah a tum lo tih a sawi a, hetih lai hian Michail Antonio erawh season thara player a chhawr tur ho zingah a tel ve dawn lo.

Brazil international Paqueta hi pawisa inthlapna chungchangah chhui a ni a, Football Association lamin uluk taka an chhui hnuah a fihlim. Manchester City nen sawi zawm a ni a, chhuak mai tur ang pawhin a thawm a ring hman hle.

Mahse, Hammers manager Potter chuan, "Nipui bazar lai a ni a, thil mak leh danglam tak tak pawh a thleng thei reng, engmah sawi lawk theih a ni lo. Amaherawhchu, tun dinhmunah chuan Lucas hi kan hnenah a hlim.

"Club tan a inpe em em a, khelmual chhung leh a pawnah kan tana mi ṭangkai a ni. Kan hnenah hian naumti takin football khel chhunzawm zel se la, kan tha ti chaktu ni zel rawh se tih hi kan duhthusam a ni," tiin a sawi.

Season tharah Antonio a chhawr zui dawn em tih sawhna chu Potter chuan, "Dawn lo," tiin a chhang a, club lam nena an inremna zo tawh player chu tuai thar leh tumna a awm lem lo niin a sawi bawk.

Kum 35 mi Antonio hian nikum December khan car chesualah hliam na tak a tuar a, a thi mai dawn emawni tih rinna pawh a lian hman. Mahse, a dam ṭha leh tawh a, an ram Jamaica tan Concacaf Gold Cup pawh a khel thei leh tawh a ni.

West Ham hian tun hnai khan striker Callum Wilson chu kum khat chhung atan an lalut fel thung. Newcastle leh Bournemouth tana khel tawh Wilson hi kum 33 mi a ni tawh a, a vanglai pel tawh mah se a tawnhriat neih te a ṭangkai thei ang.

Season hmasa khan Wilson hian Magpies tan Premier League match 18 chiah a khel a, striker ṭha Alexander Isak nen an awmdun miau avangin atan inkhelh tam a harsa, tunah chuan chona thar hmachhawn turin Hammers a pan.

Wilson chuan, "Club ṭha West Ham ten an hnena khel tura min duh hi ka lawm. Player ṭha tak tak an awm a, coach ṭha Graham Potter enkawlna hnuaiah sang tak kan thleng thei ngei ang tih ka ring tlat a ni," tiin a sawi.