Lakers tan Doncic a rinawm

Luka Doncic chuan Los Angeles Lakers tan contract a ziak thar a, an inremna hi kum thum chhung atan niin US dollar maktaduai 165 hua hlu a ni a, an inremna hi a lian rem rem hle.

Slovenian star Doncic hian kumin tir lam khan Lakers hi a zawm, an beisei angin hlawhtlinna chang nghal hluai lo mah se hmathlir thui tak an nei. Lakers president of basketball Rob Pelinka chuan, "Luka Doncic leh Los Angeles Lakers chuan kan hma hun kan chingfel.

"Luka hi tunlai player ṭha berte zinga mi a ni a, team dang pawhin an hnena khel tura an duh em em a ni. Chutiang mi kan thlungnghet thei chu a lawmawm hle, court chhunga theihtawp chhuah mi a nihna te hi a ṭhatna tizualtu a ni," tiin a sawi.

Doncic hian kumin February khan Dallas Mavericks aṭangin Lakers hi a zawm. A club thar tan hian regular season match 28-ah bul a ṭan hman a, chawlhrualin match khatah point 28.2, rebound 8.1, assist 7.5 leh steal 1.6 a nei phak a, a che ṭha pangngai nghal hle.

Doncic chuan, "Season tin mai hian chawlh laiin eng kawng emaw zawng tala hmasawn ka tum ṭhin. Kuminah pawh ka taksa ka enkawl uluk em em a, season thar a lo thlen hunah chuan player ṭha lehzual zawk ka nih ngei ka beisei," tiin a sawi.