ISL club ṭhenkhat a tawp dawn?

Odisha-in an hnuaia mite contract an titawp lailawk a, hetiang boruak karah hian ISL club Bengaluru FC, Chennaiyin FC leh Kerala Blasters te chu tihtawp mai an tum tih thawm a lo awm ve bawk.

Kerala Blasters bik hian thla hmasa khan player-te chu an duh lam pan turin zalenna an lo pe tawh a, ISL hma hun chiang lo avangin player-te chu an duhthlannaa engkim a innghah thu an hrilh.

Blasters CEO Abhik Chatterjee chuan, "Player-te hi chhuahtir hrim hrim kan duh a ni lo a, mahse, an chhuak duh a nih chuan transfer fee kan ngiat loh tur thu kan hrilh.

"Tunah chuan thil thleng thei pahnih a awm - ISL khelh tlai emaw khelh loh tawp a ni. A chhe ber pawh thleng se, player-ten, "Engmah min hrilh lo a," tia min chhuahchhal tur kan duh lo. Chuvang chuan a nih ang takin thil kan hrilh," a ti.

Odisha-in player-te contract an titawp lailawk a, Blasters-in player-te chhuah an phal bawk a, ISL club ṭhenkhat chuan an player-te contract tihtawp lailawk an tum ve meka sawi a awm bawk.