A tuar hmasatu Odisha

ISL hma hun chiang lo chungchanga thawm nei hat hmasa ber chu Odisha FC an ni. ISL club hian an player, coach leh staff engemaw zat contract chu an titawp lailawk a, ISL hma hun chiang lo chu an puh.

Odisha neitu Rohan Sharma chuan, "League ṭan hun tur a chiang lo a, Odisha-ah practice-na tur emaw inkhelhna tur hmun emaw kan nei lo a, ISL kal dan tur a chian loh avangin sponsorship hmuh theih a ni lo a, pawl pahnih inremna a tawp tawh dawn avangin engmah tih theih a ni lo," a ti.

ISL club buaina hi AIFF leh FSDL buainaah chauh a ni lo a, an khelmual leh practice nana an hman ṭhin, Kalinga Stadium chu season tharah an hman theih zel dawn leh dawn loh a la chiang lo!

Rohan Sharma hian Odisha sorkara infiamna thuneitute hnenah dilna thlen tawh mah se, engmah chhanna an la hmuh loh thu sawiin, "Odisha hi chhuahsan turin min duh em ni chu aw, tih mai tur a ni," a ti.

Hetihrual hian Rohan chuan club titawp anga sawi an nihna chu a pha a, Odisha neitupa chuan, "Media ṭhenkhatin an tarlang anga club titawp erawh kan ni lo. Kan staff pawimawh zualte chu kan hnenah an la awm reng a, hmeichhe team chu a kal ngaiin a kal bawk.

"Chutihrual chuan hma hun chiang lo tak chunga club-a share neitute hnena vaibelchhe tel thawh tura tih reng chu harsa tak a ni," a ti.

ISL club hian player-te chu club dang zawm an duh chuan zawm tura zalenna an neih thu an hrilh tel a, hetihrual hian Vanglaini thudawn danin, Odisha hian player ṭhenkhat chu transfer fee tel loa chhuahtir an phal lo.

Odisha hian season hman zawh tak ISL-ah khan Mizo player panga an kawl a, Jerry Lalrinzuala (Defender), Jeremy Zohminghlua (Defender), Isak Vanlalruatfela (Midfielder), Lalṭhathanga Khawlhring (Midfielder) leh Jerry Mawihmingthanga (Forward) te an ni.