Spurs-ah Palhinha a lut

Tottenham Hotspur chuan Bayern Munich aṭangin midfielder Joao Palhinha chu season khat chhung loan-a khel turin an la lut a, season tawpah an duh chuan euro maktaduai 30-in a nghetin an lei thei ang.

Kum 30 mi midfielder hian July 2024 khan Bayern hi a zawm a, a man hi €51mtd bakah, a khelh ṭhat dan a zira €5mtd pek belh tura tih a ni a, kum li atan contract a ziak.

Mahse, Portugal international hian Bayern-ah beisei angin hmun a chang lo a, inelna hrang hrangah match 25 chiah a khel - Bundesliga-ah match 17 a inlan ve hram.

Hetihlai hian Spurs-in defensive midfielder an lo zawng ve mek bawk a, Yves Bissouma leh Rodrigo Bentancur te hma hun a chian loh avangin coach thar Thomas Frank-a'n defensive midfielder thar mamawhin a inhria.

A tawpah chuan Palhinha an la lut ta a, Premier League hmelhriat sa a nih bawk avangin insiamrem turin hun a mamawh dawn lo - Fulham tan season hnih a khelh chhungin match 79-ah goal riat a khung a, assist a nei bawk.

Season hnih a khelh chhung hian tackle vawi 300 ngawt a nei a, EPL-ah heti chhung hian ani aia tackle ngah an awm lo a, interception (92) ngah lamah parukna a ni bawk. Mahse, season hnih chhung hian yellow card vawi hnih a hmu a, amah hnaih bertu aiin vawi nga a hmu tam.

Spurs hian Palhinha hi tun nipuia player an lakluh pathumna a ni a, a hma hian £55mtd man Mohammed Kudus an lei tawh a, Bayern aṭanga loan-a an hawh Mathys Tel chu a nghetin an la lut bawk.