Swiatek-i a chak lo

Wimbledon champion Iga Swiatek chu Clara Tauson hneh loin Canadian Open last 16-ah a tla, hard court inelna neih laiah hian player langsar chesual an tam ta hle.

Nimin zing Centre Court-a inkhelah, seeded pahnihna Swiatek hian a service vawi thum a hum thei lo a, inkhel inhnehtawk leh hmuhnawm takah 7-6 (7-1), 6-3 in a chak lo, seeded pakhatna Coco Gauff tlak hnu chiahah pahnihna a tla ve leh nghal.

Swiatek leh Gauff te bakah hian champion lai Jessica Pegula leh seeded palina Mirra Andreeva te pawh an tla tawh a, inelna neih laiah hian beisei loh result kan hmu tam - US Open khelh turah pawh result danglam kan hmu nual mai thei.

Hnehna changtu, seeded 19-na Tauson chuan, "Hun rei tak chhung rim takin ka bei a, engtik niah emaw chuan player ṭha leh langsar ka hneh hun a la thleng ve ang tiin ka sawi ṭhin, tunah chuan a takin a lo thleng ve ta.

"Iga hi player ṭha leh ropui a ni a, kan inkhelh dawn khan mi tam zawk chuan chak lo turah min ngai ngei ang. Mahse, chutiang ngawt erawh chu a ni lo, a tir aṭang khan beiseina nen inelna ka hmachhawn a ni," a ti.

Denmark nula Tauson hian quarterfinal-ah chuan Madison Keys a hmachhawn leh dawn. Australian Open champion Keys hian inkhel dangah Czech Republic nula Karolina Muchova chu 4-6, 6-3, 7-5 in a lo hneh ve thung a ni.

Inkhel dangah Naomi Osaka pawh a chak lo. Grand Slam vawi li champion tawh hi Anastasija Sevastova nen minute 49 chhung chauh an inkhel hman tihah 6-1, 6-0 in a chak lo, game khat chauh la chunga tlawm hi Osaka tan mualphona a tling.

Japanese nula Osaka hian Austrlian Open leh US Open nomawi vawi hnih ve ve a chawi tawh a, hard court hi a inkhelh thiamna hmun a ni. Mahse, fa a neih hnuah erawh ngai a la awh leh thei lo, a tan New York khawpuia inelna lian an khelh hunah pawh thil a awlsam dawn lo niin a lang.