Maddison a hliam na

Tottenham Hotspur midfielder James Maddison chu season thar inbuatsaihna an neih laiin a hliam a, a chawlh chen tur tak hriat la ni lo mah se a hliam na angreng tih erawh a chiang thung.

Spurs hi Newcastle United nen an inkhel a, khup hliam vangin Maddison hi zawn chhuah a ngai. Season hmasa Europa League final-a Manchester United an hmachhawn ṭum pawhin a khup hliam vang bawk hian a inlan thei lo, tun ṭuma mi nen hian a inang a ni.

Tottenham head coach Thomas Frank chuan, "A chang chuan hringnun leh football-ah hian, hliamna leh lungngaihna a lo thlen chang a awm ṭhin. Tun ṭum chu kan team tan lungngaihna a lo thlen hun a her chhuak.

"Chiang takin la sawi thei lo mah ila, a lan dan chuan season hmasa tawp lama a hliam ang bawk kha tunah a tawk leh ta chiah. Dam leh thuai turin kan duh a, kan zingah a lo kir leh vat theih nan ṭha taka enkawl a ni ang," tiin a sawi.

Seoul, South Korea-a inkhelah hian Wales forward Brennan Johnso-a'n Spurs tan goal a khung hmasak chu Leicester City winger hlui Harvey Barnes-a'n a sut a, 1-1 in inkhel a tawp.

Premier League season thar ṭan hmain Tottenham hian Bayern Munich leh Paris Saint Germain an la tum leh dawn, an league match hmasa ber atan August 16, Inrinni zanah Burnley an mikhual ang.