Inthamna chungchanga Beckenbauer puhna Thutlukna awm loin an ti tawp
Germany-in FIFA World Cup 2006 an thlen theih nan Franz Beckenbauer chu FIFA hruaitu hlui Mohamed bin Hammam hnenah thamna pea puh a ni a, hemi chungchang an ngaihtuahtuna hmun Switzerland-ah thubuai ngaihtuah hun chhung a zawh hman avangin thutlukna a awm ta lo.
German football legend Beckenbauer hi 2006 World Cup organising committee hotu a ni a, hemi ṭum hian South Africa, England leh Morocco ten World Cup thlen an tum ve bawk.
July 6, 2000 khan 'vote' lak a ni a, round hmasa berah Germany-in hma an hruai fal. Round hnihnaah ram pathum Germany (11), South Africa (11) leh England (2) te telin a thleng tur a chiang ta lo.
Final round-ah Germany 12-11 in South Africa lakah an chak a, round hnihnaa England vote-tu Oceania aiawh Charlie Dempsey-a'n vote tura an tih South Africa vote se, president Sepp Blatter-a'n thutlukna a siam dawn avangin Africa ramin World Cup thleng tura a ngaih a ni.
Thil thlen dan hi chhui zui a ni a, Beckenbaur chu kum 2005 khan FIFA executive Mohamed bin Hammam hnenah thamna pound maktaduai 8.4 peah an puh. October 2015 khan Beckenbauer chuan, "Vote kan hmuh theih nan tumah pawisa ka pe lo," tiin a ṭang tlat.
Switzerland-ah hian thubuai ngaihtuah theih hun chhung hi kum 15 a ni a, Covid-19 vanga thubuai ngaihtuah hun sawn a ni bawk nen kum 2005 thil thleng ngaihtuah hun chhung hi a zo. Germany-in World Cup a thlen danah dik tawk loh a awma ngaih a nih avangin mi pali chhui zui an ni a, Beckenbauer hi chung zinga mi chu a ni.
FIFA chuan, "Thutlukna awm lo a, thubuai a tawp tur hi pawi kan ti. Football tan chauh a pawi lo a, Switzerland-a rorelna dik kengkawhtu tan pawh a pawi hle," tiin thuchhuah an siam.
Kum 74 mi Beckenbauer hian 1974 khan player ni chungin World Cup nomawi a chawi a, 1990 World Cup-ah khan manager ni chungin an ram Germany a champion pui leh bawk.