Caroline Wozniacki-i'n tennis a mangṭha

Hmeichhe tennis world number 1 hlui Caroline Wozniacki chuan nimin khan player a nih laia a match hnuhnung ber a khel ta. Denmark nula hi Australian Open third round-ah a chak lo a, inelna dang hmachhawn tawh loin a chawl zui ang.

Australian Open-ah beisei loh result lian tak kan hmu bawk. Grand Slam vawi 23 zet champion tawh Serena Williams chu Chinese nula Wang Qiang hneh loin a tla bawk a, American star hi la chawl ve dawn chiah lo mah se atan hun ṭha a liam ve mek tih a lang chiang ta hle bawk.

Caroline Wozniacki hi kum 29 mi chauh a la ni, mahse nikum November thla khan Australian Open 2020 khelh zawh hnuah a chawlh tur thu a sawi lawk. Melbourne Park-ah a inlan a, match hnih a khelh hmasakah chak mah se nimin khan Ons Jabeur chu 7-5, 3-6, 7-5 a hneh loin a tla.

Chawlhkar 71 chhung zet world number 1 nihna dinhmun luah tawh Wozniacki hian 2018 Australian Open-ah khan a duhthusam ti puitling turin Simona Halep hneh chungin nomawi a chawi. Hman hun eng tak nei lai la ni mah se a kut bawrah ruh na a neih reng avangin a duh anga rei a khel thei lo.

Tennis a khelh hun chhungin WTA titles 30 zet a chawi hman a, a infiamna ngainat aṭang hian cheng vaibelchhe 2,52 vel zet a vaw chhuak hman - tunah chuan a duh lam lam a hawi thei tawh dawn "tennis erawh a thinlungah a thi tawh ngai lo ang".

Melbourne Arena-a a inkhelh zawhah mipui lamin Wozniacki hi an thlah a, lungchhe takin tennis court a chhuahsan. Wozniacki chuan, "Kum 15 chhung nitina ka chenchilh chu a tawp ta, zinkawng ngaihnawm leh ropui tak chu a ni.

"Ka match hnuhnung berah set thum ka khel a, point hnuhnung ber chu forehand vuak sual vangin ka khingpui ka pe. Hma lam hawi zawnga na taka ball vuak sual hi ka ching a, tennis ka khelh hun chhung zawnga ka thil zir langsar tak kha a ni," a ti.

A hma hun zawhna chhangin Wozniacki hian chhungkua a vur tawlh (skiing) bakah ṭhiante nena zin kual vek a chak thu a sawi a, nikum June thlaa a neih a pasal David nen hun hlimawm leh nuam tak hman a duh thu a sawi bawk - David hi NBA basketball player hlui a ni.

Vawi sarih a champion tawhna hmunah Serena Williams chu vuak tlak a ni leh ta. World number 1 hlui hi China nula Qiang lakah 6-4, 6-7 (2-7), 7-5 in a chak lo - Grand Slam nomawi dang chawi leh tur chuan French Open a nghah leh phawt a ngai dawn.

Grand Slam vawi 23 champion tawh Serena hian Margaret Court-i record (24 titles) nihrual a tum ruh hle a, mahse a hlawhtling thei ta rih lo; kum 38 mi a nih bakah fa a neih tawh avangin atan vanglai anga khelh ṭhat a harsa tawh.

Player pahnih hi nikum September thla khan US Open-ah an inkhel, khawtual nula Serena hian point 15 chauh hloh chungin nuamsa takin hnehna a chang - tun ṭumah erawh thawnthu a danglam ta. Serena hian 2017 Australian Open hnuah major title a la chawi leh lo.

Nimin third round inkhel dangah world number 1 Ashleigh Barty chuan Elena Rybakina chu 6-3, 6-2 a hnehin fourth round a lut, tualchhung nula chhuanvawr hi a service hmasa pahnih chhuhsak mah se chhuhsak let ve lehin hnehna a chang.

French Open champion Barty hian a match dawt lehah chuan seeded 18-na Alison Riske a hmachhawn leh ang; Riske hian doubles lama Barty ṭanpui Julia Gorges chu singles match lamah 1-6, 7-6 (7-4), 6-2 in a lo hneh ve thung a ni. Season hmasa final-a chak lo Petra Kvitova chuan Russian nula Ekaterina Alexandrova 6-1, 6-2 in a hneh a, ani hian Madison Keys 6-4, 6-4 a hnehtu Maria Sakkari a hmachhawn leh ang. Sakkari hi a vawi khat nana Grand Slam third round paltlang ve chauh a ni.