FIFA-in substitute panga neih a rawt
Football khawvela thuneitu sang ber FIFA chuan coronavirus hri leng vanga football chawlhsan mek chu khelh chhunzawm leh a nih hunah substitution panga siam theih turin an ti a, hei erawh rawtna chauh a la ni a, kaltlangpui ngei a ni dawn tihna a ni lo.
FIFA ruahman ang hian kaltlangpui a nih erawh chuan 2021 season zawh thleng he dan hi kalpui theih a ni ang - FIFA chuan he dan hi match khelh zawn tur tam lutuka player-te an chauh loh zawk nana ti an nih thu an sawi.
IFAB thu thu
FIFA hian a duhdan angin dan a siam thei ngawt lo a, rawtna hi football dan duangtu International Football Association Board (IFAB) hnenah thlen tur a ni. IFAB hian league kalpuitute ngaihdan a la tel tura ngaih a ni.
Hetihrual hian BBC tarlan dan chuan IFAB hian FIFA rawtna hi an pawm ngei a rinawm - rawtna a awm hma hian player-te an hahdam zawk theih dan tur hi sawi a lo ni tawh a, substitution tam zawk siam theih hi rawtna zingah a lo tel tawh.
Hriselna a pawimawh
FIFA-in season khelh chhunzawm leh a nih huna player-te hahdam dan turah rawtna an siam chungin player hriselna chu an ngaih pawimawh hmasak a nih thu an sawi a, "Mi pakhat lek pawhin nunna chan dawn se, risk lak chi a ni lo," an ti.
Football khawvela thuneitu sang ber aiawha thupuangtu chuan, "Kan duh ber chu player-te himna hi a ni. Rawtna kan neih chhan pawh hi chauh lutuk avanga player inhliam tur venhim nana kan tih a ni," tiin an sawi.
Dan thar chu
*Football-a substitution player pathum aia tam siam theih loh ni ṭhin chu player panga thleng siam theih tura tihsan a ni.
*Substitution hi vawi thum chauh siam theih a la ni dawn a, mahse player thlak theih erawh panga a ni thung.
*Extra time bika player thlak belh theihna dan chu a ding reng ang a, player paruk a thlak theih dawn tihna a ni.
*December 31, 2021 thlengin national team-te chuan he dan hi an hmang thei ang.