Premier League Club Bihchianna Parlour, Seaman, Keown, Dixon, Adams

Tun ṭumah erawh player langsar deuh dah ṭhain goal venhim lama tha thawh hlawk ho rawn phochhuah a ni ang. Ray Parlour, David Seaman, Martin Keown, Lee Dixon leh Tony Adams te rawn thur chhuah a ni.

England khaw pakhat Romford-a piang Ray Parlour hi Arsenal youth system chhuak a ni a, Gunners tana a khelhpui Marc Overmars chuan 'Romford Pele' tihin a hming a phuah. 

Parlour hi March 7, 1973 khan a piang a, feet ruka sang niin thahrui a ngah hle. Kum 1992 aṭangin Arsenal senior team tana khel ṭan a, Arsene Wenger-a'n kum 1996-a London club a enkawl kha hlawkpuiin player pawimawh a ni ṭan.

Arsenal-in 1997–98 season khan Premier League leh FA Cup nomawi an chawi a, FA Cup final-a Newcastle 2-0 a an hneh ṭumin goal hnihnaa Nicolas Anelka khung tur a siamsakin man of the match a thlan a ni. Heti chung hian England boss Glenn Hoddle chuan World Cup 1998 khel turin Spurs midfielder Darren Anderton a thlang zawk.

Parlour hi khelmual chhungah a thawkrim a, a chau har takzet. Dressing room-ah pawh team khaipa a ni a, 'Invicible Team'-ah pawh a tel. English midfielder hian Premier League nomawi pathum, FA Cup pali leh League Cup pakhat a chawi a, Gunners tana Premier League match khel hnem ber a nih bawk avangin legend tih a phu takzet. 

David Andrew Seaman hi September 19, 1963 khan a piang a, Rotherham, England-ah a piang. Leeds United academy aṭangin a inzir a, senior team-ah erawh a inlan lo. Arsenal a zawm hma hian Seaman hian Peterborough United, Birmingham City leh Queens Park Rangers tan a khel a, Gunners-ah awm hmun a sawhnghet.

Seaman hian 1990 aṭangin Arsenal a zawm a, London club hi First Division-ah champion pui hmanin Premeir League awm hnuah pawh vawi hnih a champion pui leh a, FA Cup-ah phei chuan vawi li a champon pui. 

World Cup 2020-ah Ronaldinho freekick a chhuah avangin Seaman hi mualpho deuh mah se vawi khat a chetsual hian a sulhnu a ti bal pha lo. Sap pachal tih hriat taka hmuihmul danglam tak leh a sam ṭawn kawh teuh ṭhin te avangin chhinchhiah a awlsam a, IFFHS World's Best Goalkeeper of the Year 1996-ah pahnihna a nih phak avangin keeper ṭha tak a ni tih a chiang hle.

Arsenal ropuina ber chu 'Invincibles' Team kha an ni a, chutihrualin Wenger-a'n team a dintirh lama tlarhnung te khan Invincibles-ah hmun pawimawh chang pha lo mah se Gunners ṭantute thinlungah hmun pawimawh an chang.

Captain Tony Adams ngat phei chu 'one man club' a ni a, Arsenal-ah hun pum a hmang. Parlour ang thoin thoin Adams hi Romford-a piang a ni a, 1983-2002 chhung Gunners tan a khel. London club hi First Divison leh Premier League-ah vawi hnih ve ve a champion pui a, Emirates Stadium-ah pawh a lim dah a ni.

Lee Dixon hi Adams ang thoin Invincbles team-ah khan a tel lo a, kum 2002 khan football khelh a chawlhsan. Manchester-a piang Dixon hi Burnley aṭangin a inzir a, Burnley, Chester City, Bury leh Stoke City tan a khelh hnuah Arsenal hi a zawm. United legend Ryan Giggs chuan, "Dixon hi hmachhawn a harsa. A rang ringawt lo a, a fing tel. A awmna tur takah a awm ṭhin a vangin bum a harsa a, Highbury-ah phei chuan hmachhawn a harsa lehzual," tiin Dixon chanchin a sawi.

Arsenal tlarhnungah Martin Keown hming lam tel ngei a ṭul. Kum 53 mi Keown hi Gunners youth sytem chhuak a ni a, London club aṭang hian intuai hriam turin Brighton & Hove, Aston Villa leh Everton-ah te kal kual bawk mah se a hmangaih hmasa Arsenal-ah bawk um 1993 khan a let.

Keown hi a rorum vangin hriat a hlawh a, Invincibles kum khan league match 10-ah a inlan. A khelhpui ṭhin Parlour chuan, "Freddie Ljungberg khan training ground-ah rualbanlo motor dahnaah a dah ṭhin a, kawngka bul a hnaih vang dah a ni. Keown-a ngaihdan a ni ta lo a, Freddie hi a zilh hlak. A dah nawn tawh lo," tiin Keown a chanchin a sawi a, hei hian Arsenal-ah hmun pawimawh a chang tih a nemnghet.