Lehmann a dam tawh
Arsenal goalkeeper ropui ni ṭhin Jens Lehmann chuan coronavirus hnehin a dam tawh thu a sawi a, hri leng a kai tawh zinga hrehawm ber a nih thu a sawi tel bawk.
Kum 50 mi Lehmann hi March thla laihawl khan Covid-19 a kai tih hriat chhuah a ni a, enkawlna ṭha tak dawng mah se hun eng emaw ti chhung chu enkawl a ngai.
German keeper chuan, "Ni khat leh a chanve chhung vel chu ka khua a sik a, ka khuh nasa hle bawk. Hri leng ka kai vangin ka mu tlem a, midang nena intlawhpawh thei loa khung hrang ka ngaih bawk avangin a hrehawm ka ti hle.
"Tunah chuan Covid-19 lak aṭangin ka fihlim tawh, midang lak aṭang erawh chuan a theih chin chinah ka la awm hrang ang. Inhnaihchilh loh hi coronavirus darh zel tura kan inven theihna ṭha tak a ni," a ti.
A vanglai chuan Lehmann hi khawvel keeper ṭha zingah a tel phak. Hneh loh nei loa Gunners-in Premier League nomawi an chawi ṭum khan a tel; Champions League-ah pawh a zawna match 10 chhung goal a chhuah loh chu record a ni bawk.