AIFF Academy tan Dinthar an ṭha hret

Dinthar FC-in I Day Football quarterfinal lut turin nimin khan FIFA AIFF Talent Academy 5-1 in an sawp. Tun ṭum inelnaah hian team 11 an tel a, Aizawl khaw pawn tan quarterfinal-ah hmun a awm lo. MPL club pahnih Lawngtlai club MLS FC leh Lunglei club SYS FC bakah Mizoram pawn aṭanga chah luh FIFA AIFF Talent Academy ten group stage an paltlang zo lo.

Nimin inkhelah Maimawms-in an player pawimawh MS Dawngliana chhawr thei lo mah se goal khung kawngah harsatna an nei lo. Minute 12-naah Dintharin freekick pet thutin, captain R. Laldanmawia ball vawrhluh chu Lalrintluanga'n (Tutua) ṭha zeta la thlain goal hmahruai a khung.

Minute 26-naah goalkeeper pet sual chu Tutua'n changin Danmawia a pe a, Sialhawk Express hian chance ṭha hi a hlah lo. Dinthar an khel ṭha zel a, Lalremtluanga (Mamatea) corner pet chu LH Lalchawimawia'n minute 33-naah a tauh lut.

AIFF Academy-in ngam lo deuh mah se Armed Veng South rawlthar R.Lawmsangzuala'n (Mama) minute 60-naah box pawn aṭangin si phurh a sut ṭhen. Tun inelnaah AIFF Academy hian goal hnih an khung a, Mama bakah hian Mualṭhuam rawlthar R. Lalremruatfela'n Chanmari lakah a khung.

Dintharin goal chhuah mah se an buai phah lo a, a hma aiin an nawr nat phah zawk. Tutua'n minute 78-naah goal hnihna a khung a, minute hnih hnuah Tutua ball pek chu substitute Lalhmingthanga Sailo-in (Tetea) Dinthar goal ngana turin a khung. Maimawms 5-1 in an chak a, quarterfinal-ah Lalsangzuala Hmar enkawl Saikhamakawn an hmachhawn ang.