Silly Point: Hmawr bawkna hmuhnawm

Test cricket ṭum nga inkhelhah a ni hnuhnung ber an thleng vek. Ni 25 daih inkhel, over 1860 vawma 6736 runs vuak chhuah a nih hnu leh wicket 174 a tlak hnuah, tun Thawhṭanni liam ta khan England leh India chu 2-2 in series an khar. Anderson-Tendulkar Trophy chu inkawlṭawm a ngai hrih dawn ta a ni.

Engkim awmna  Test Cricket

The Oval-a record nei ropui lutuk lo India team chuan 2-1 in an hnufual tih hre rengin, series an draw dawn chuan hnehna an chan a ngai a. A ni, hnehna ngei chu an chang a ni. Jasprit Bumrah a khel thei dawn lo a, inhliam avangin Rishab Pant chu India-ah a lo let leh tawh a, Men in Blue hi hnufual zawk tura rin an ni.

India batting line up chu an rintlak viau a, wicket 20 la turin chau ve tawh Md Siraj leh Test hmasa pahniha sawisel hlawh Prasid Krishna leh tluklehdingawn Akash Deep te bakah all rounder spinner Ravindra Jadeja leh Washington Sundar te hi ka ring tawk lutuk lem lo. Pace all rounder awm tawh bawk si lo, Karun Nair a tel loh theih loh bawk. Dik tak chuan India chungah beiseina dah san ngam chi a ni lo.

India-Khotom

Ṭhumvawra chak thei lo India-in Oval pitch hring kalh karah a ni khat niah ball an vuak hmasak a ngai. Rin ang ngeiin an turu lo a, a career tana drip ṭha mi dawngtu Karun Nair-a'n 57 runs a siam zarah 224 runs an tlin hram a nih kha. Khatiang ang Oval pitch bawngpui sawm vel pawh tlattir theihna tur khawpa phaitual hnim hring dup maiah khan ball a swing dawn tih a chiang.

Chaute hnena chakna pe ṭhintu

India-in chak an tum a nih chuan first innings-ah England chu run tlem thei ang ber an siamtir a ngai. A ni hnihna a la ni bawk a, Md Siraj leh harhtharna chang bawk Prasid Krishna ten pitch an hmang ṭangkai ve thung. A hmuhnawm a ni.

A ni thum niah pitch pawh batting a lo nuam tawh a, series bul ṭan ṭha Yashasvi Jaiswal-a'n a tawp khar ṭhat a tum a, century kan hmu. England tan nightwatchman Akash Deep-a half century an siamtir kha a pawi thui dawn tih a hmuhlawk theih.

Chutirual chuan ball a umna lama a dar ruh tilak Chris Woakes-a'n ball a vawm zui thei lo a, English bowler pakhata an tlem bakah an batting line up a pan sawt ta bawk.

English Counter attack

Test cricket-a 374 runs chak tura um hi thil namai a ni lo a, thil thleng zen zen lo a ni. A ni lina batting nawm hunlai ber a ni. Tin, hetiang ang hi umpha tur chuan Bazball tactic hmang English batting line up bak hi rintur an awm chuang lo.

Test hmasa ber Headingley-ah 371 runs an lo umphak tawh nghe nghe kha. Joe Root leh Harry Brook te counter attack a turu takzet a. Thawk khat lai phei kha chu T20 kan en ta zawk emaw tih mai tur a ni. India an ngui, beisei a chau ṭan.

Mahse

Cricket mi ril leh tawnhriat ngah ten an sawi fo chu, batting emaw bowling hmanga inkhel i zawhpui a, team i chakpui theih chuan, mahniin a tawp thlenpui tur, midang kuta khek loh tur an tih chu a takin a lo lang. Concentration hloh avangin Joe Root leh Harry Brook te an in vaw hlum a, thawk leh khatah England batting line up a chim ta duai duai mai an ih kha.

Ruah sur vangin ni lina tihtawp lailawk a ni a. A ni hnuhnung berah chak turin England-in 35 runs chauh an Siam a ngai a, India lamin wicket li an mamawh thung.

Tawpna niah ka hringnun hi

Thawhṭanni chawhnu dar 3:00 chho aṭang kha chuan India ramah chawlh lak runpui neih a ni a. Pisa kaiten ni chanve leave an la, auto leh taxi pu te pawhin eng passenger mah an phur hman lo.

England tan Jamie Smith a awm avangin 35 runs siam tur hian beisei a sang zawk a, India lam hi dinhmun chaurau zawk an ni. A batting avanga tum tam tak England lo chhanhim tawh, mahse a batting avang tho a, mawl leh thluak hmang lo tia an sel fo Jamie Smith erawh a thluak thawl tuk India-in an nangfuh.

Ṭul miah loah off pawn lam ball thlahlam hrih mai tur a khelh luih ṭalh avangin a invawhlum a, England tailender an rawn luh a ngai ta a nih kha. Tun inkhel turning point-ah ka puang hial a ni. Chris Woakes kut khingkhat nen chauh bat hum chunga a rawn luh khan 18 runs a la ngai a. Gus Atkinson a tan a koki a, a phurh theih tawk aia lian a ni tawh a, ball over 80 chuang tawh la vawm kual zuk zuk Prasid Krishna leh Md Siraj te a tawpa India chakna thlen tirtu an ni ta a nih kha...

Test series hmuhnawm leh ngaihnawm a ni a, inkhel ni 25 chhung drama bakah chhuk leh chho chi hrang hrang team pahnih ten min hlui a, a ropui lai berah ka chhal e.