Champion lai hnehtu Zverev

Alexander Zverev chuan Canadian Open champion lai Alexei Popyrin a hneh a, hard court inelna neih laiah semifinal a lut - final thleng tur chuan Karen Khachanov a paltlang leh a ngai dawn a ni.

Nimin zing khan Centre Court-ah seeded pakhatna Zverev hi a inlan, a khingpui Popyrin lakah hian 6-7 (8), 6-4, 6-3 in hnehna a chang a, ATP Tour semifinal vawi 75 a lut tling ta chiah bawk.

Tuna mipa tennis la inkhel zingah Zeverev leh Novak Djokovic te chauh hi ATP Tour semifinal vawi 75 lut tling thei an ni - German tlangval sulhnu a nep lo hle a, nomawi chawi tur erawhin hmabak a la nei thung.

Kum 28 mi Zverev chuan, "Set khatna ka hloh phawt a, ka tan kha chuan kawng a harsa dawn tih ka hre nghal. Mahse, keimah leh keimah kha ka infuih mawlh mawlh a, ka khingpui kha a khelh ṭhat em avangin hna kha a harsa ka ti hle bawk.

"Tihsual neih zeuh kha a pawi thui thei hle a, na taka min rawn nawr kara lo beihlet dan tur ngaihtuah chhuah kha a awlsam lo hle bawk. A tawpah erawh beidawng loa ka beih rah ka hmu," tiin a sawi a, final thlen ngei a tum tih a sawi bawk a ni.

Quarterfinal inkhel dangah Karen Khachanov chuan Alex Michelsen chu 6-4, 7-6 (7-3) in a lo hneh ve bawk. Russian tlangval Khachanov hi seeded 11-na a ni phak ve tho a, player ṭha a nih avangin Zverev tan hmachhawn a awlsam lo ang.

Canadian Open hi US Open inbuatsaihna zinga mi a ni a, inelna lian atana pawimawh tak a nih bakah Grand Slam dawta inelna ngaihhlut Masters 1000 tournament a nih avangin an ngaipawimawh hle a, champion tan a hlu ṭhin hle.

Tennis season kal laiah Grand Slam khelh tur pali zinga pathum an khel zo tawh. A hnuhnung ber atan August 24 aṭanga September 7 chhung hian New York khawpuiah US Open an khel ang.