Leverkusen-ah Patrik Schick a nghet

Bayer Leverkusen chuan an player Patrik Schick an thlung nghet a, Czech Republic striker hi kum 2030 thleng an hnena cham turin inremna an ziah pui a, contract an ziah fel thu hi Bundesliga club chuan an tarlang a ni.

Schick-a contarct hmasa chu kum 2027 a zo tur a ni a, mahse inremna thar an neih leh tak avangin hun rei zawk a cham dawn a, nipui bazarah an player ṭha tam tak an chhuah avangin ani an chelh thei hi an tan chuan chanchin lawmawm a ni ang.

Xabi Alonso enkawlna hnuaiah Leverkusen hian 2024 khan Bundesliga nomawi an chawi a, mahse tun nipui bazar laiin an coach Alonso bakah midfielder Granit Xhaka, attacking midfielder Florian Wirtz, right back Jeremie Frimpong leh defender Jonathan Tah te an chhuak.

Schick hian season hmasa khan Leverkusen tan inelna hrang hrangah match 45 a khelh aṭangin goal 27 a khung a, kum 2020 a Bundesliga club a zawm hnuah goal 64 a khungsak tawh a ni.

Leverkusen hi Erik ten Hag-a'n a enkawl an ni a, Manchester United manager hlui kaihhruaina hnuaiah indin thar leh an tum a, player ṭha an chhuah hnem avangin Dutch manager tan erawh kawng awlsam a ni dawn lo.

Schick chuan, "Bayer Leverkusen hian team ṭha ni turin theihtawp a chhuah, nakin lawkah chuan sang tak kan thleng thei ang tih ka beisei. Bundesliga mai ni loin European football thlengin beiseina kan nei," tiin a sawi.

August tawp lam aṭangin Bundesliga season thar an khel ṭan dawn, Leverkusen hian an match hmasa berah Hoffenheim an hmachhawn ang.