French Ligue 1 season a tawp Vawiinah LFP inhmukhawm dawn
France prime minister Edouard Philippe chuan kumin September thla thleng chu an ramah football khelh a rem loh thu a puang chiang a, inelna sang Ligue 1 leh a hnuaia awm Ligue 2 te an khelh chhunzawm thei dawn tawh lo.
September thla thleng entu awm emaw, entu awm lo emaw pawha khelh a ni tawh dawn lo a, tun season mai bakah season thar ṭan hun pawh na takin a nghawng dawn tihna a ni. Football bakah infiamna lian dang pawh a huap vek.
Sorkar berin inkhelh a phal rih lo avangin an dinhmun tur tih chian a ngai dawn a, French football thuneitu sang Ligue de Football Professional (LFP) chu vawiin hian an inhmukhawm dawn - club dinhmun tur an chinfel theih a rinawm.
PM thu chu
Covid-19 vangin March 13 aṭang khan France ramah football a chawl rih tawh, an beisei dan chuan June 17 aṭanga khelh chhunzawm lehin July 25-ah zawh hman an beisei; harsatna karah pawh LFP chuan league khelh zawh an beisei tihna a ni.
Ram pumah inkharkhipna an kalpui mek a; hmun ṭhenkhatah chuan zirna in leh eitur leina hmun pawimawh chu thlah dul a ni tawh. May 11 aṭang hian inthlahdulna tih zau an tum, football lam pawhin beiseina an nei sang hman hle.
Mahse, Thawhlehni zana prime minister Edouard Philippe thusawi chuan an beiseina a titawp. Philippe chuan, "September thla hma chuan infiamna lian tham neih phal a ni lo. 2019-2020 season kal laite chu neih chhunzawm a rem tawh dawn lo a, heng zingah hian football pawh a tel.
"Mahnia insawizawi leh inhnaihchilh loa infiamna lian lo deuh a kalpui theih mai theih, mahse khelmuala a huhoa thil tih chi leh, taksa intawk hnai thei ang chi chu tih theih a ni lo ang," tiin a sawi.
Vawiinah LFP
Ligue de Football Professional (LFP) chuan April 30, Ningani hian an PM thusawi vangin an inhmuhkhawm tur thu an sawi. LFP thu chhuak hi club hrang hrang bakah khawvelin a ngaihven ang; kar hmasa khan Dutch FA chuan champion leh tlahniam awm loin Eredivisie an lo titawp tawh.
April 10 khan LFP hi an lo inhmukhawm tawh, a tam zawkin league khelh zawh an duh. Tunah chuan tu nge champion dawn a, tu nge tla hniam eng? Eng club ber nge division hniam aṭanga rawn chho ang tih an rel a ngai dawn. Dutch FA anga champion leh tlahniam bik awm loa tih tawp pawh an duhthlan tur neih zingah a tel.
Ligue 1 an chawlh lailawk hma khan Paris St-Germain chuan anmahni hnaih bertu Marseille lakah point 12 zetin hma an hruai fal tawh a, match khelh hmabak 10 la nei mah se an nomawi an hum ngei a rinawm viau.
Table mawngphah luahtu Toulouse chu a him china awm Saint-Etienne aiin point 17 laiin an hnufual zawk. Tlahniam awm loa season an titawp a nih chuan a hniam lama awm tan duhthusam a ni ang, a chung bera awm tan erawh a uiawm hle thung ang.
UCL khelh duh PSG
European football thuneitu sang UEFA chuan Champions League leh Europa League te a la titawp lo a, an hnuaia league hrang hrangte chu May 25 ral hmain an dinhmun tichiang turin a ti bawk.
French Ligue 1 a khelh theih tawh dawn lo a, hmahruaitu Paris Saint-Germain chuan league khel thei dawn tawh lo mah se Champions League chu khelh chhunzawm ngei an duh. Ligue 1 leh French Cup nomawi chawi hnem tawh mah se UCL-ah hian an la hlawhtling rih lo.
PSG chairman Nasser Al-Khelaifi chuan, "French sorkar thutlukna hi kan zah hle. Chutihrualin UEFA nena inremna siamin, khawi hmun leh hun pawh ni se Champions League khelh chhunzawm chu kan duh.
"France ramah football a khelh theih loh a nih pawhin, kan player leh hnathawktu zawng zawngte an him theihna tur hmunah kan khel mai ang," tiin an home match pawh ram dangah khelh ngai mah se an zin hreh loh thu a sawi bawk.
Arab sum hmanga an insiam len hnuah pawh PSG hian Champions League nomawi an la chawi thei rih lo a, kuminah hian German club Borussia Dortmund chu last 16-ah 3-2 a hnehin quarterfinal an lut tawh.