Everton-in Dewsbury-Hall an lei dawn

Premier League club Everton chuan Chelsea aṭanga midfielder Kiernan Dewsbury-Hall la lut turin London club hi inremna an neihpui a, pound maktaduai 28-in Dewsbury-Hall hi an lei dawn.

Everton hian kum 26 mi midfielder manah hian £24mtd an pe phawt ang a, a khelh ṭhat dan a zirin a man dang £3-4mtd hi chu pek belh leh tur a ni dawn - Merseyside club hian English midfielder hi mimal thilah inbiakna an neihpui mek a, hemi zawhah hian medical a nei zui ang.

Fulham pawhin Chelsea-a hmun chang lo Dewsbury-Hall hi lakluh an duh nia sawi a ni a, a tawpah chuan Everton-in an chang dawn ta niin a lang.

July 2024 khan Dewsbury-Hall hian Chelsea hi Leicester City aṭangin £30mtd-in a zawm a, Foxes-a a boss Enzo Maresca hnungzuiin Stamford Bridge hi a zawm.

Mahse, a beisei angin Maresca hnuaiah hmun a chang lo a, season hman zawh takah khan league match 13 chauh khelin, inelna hrang hrangah match 36 a khel - goal nga a khung a, assist vawi li a nei.

Mahse, match 36 a khelha match 17-ah bench aṭangin a lut a, vawi sarih lakchhuah a ni bawk. A tirah Blues chhuahsan hi duh lo mah se, Chelsea berin chhuahtir an pawi tih loh avangin a chhuak dawn ta.