Novak Djokovic a inhnukdawk

Cincinnati Open aṭangin Novak Djokovic a inhnukdawk a, hard court inelna lian US Open chu inbuatsaih lawkna tournament khel hmasa loin a hmachhawn dawn tihna a ni.

Grand Slam vawi 24 champion tawh Djokovic hian Wimbledon kha a khel a, semifinal-ah a chak lo. Grass court inelna lian an khelh zawh hnuah a hahchawl a, tun ṭuma a inhnuhdawh chhan hi chiang takin a sawi lang lo.

Cincinnati hma hian inelna neih mek Toronto Masters aṭangin a lo inhnukdawk tawh bawk a, kum 38 mi a nih tawh avangin tournament zawng zawngah a inlan ngai tawh lem lo, tun hnaiah erawh a inkhel tlem zual hle a ni.

Tun hmain Djokovic hian US Open nomawi vawi li a lo chawi tawh a, a champion hnuhnung ber chu 2023 kha a ni. Kuminah a inlan a nih pawhin champion tura rinkai leh beiseiawm ber erawh a ni phak lo ang.

Serbian star Djokovic hian major title lak belh tawh lo mah se a thlen chin hi a sang fal hle. Grand Slam nomawi lak tam lamah amah hnaih bertu Rafael Nadal aiin vawi hnihin a champion tam zawk a, Nadal hian inkhelh a chawlhsan tawh a ni.