Semifinal-ah Rybakina a lut

Canadian Open khelh laiah Elena Rybakina chuan semifinal a lut - Wimbledon 2022 champion hian nimin zing khan Marta Kostyuk hnehin quarterfinal a paltlang a ni.

Centre Court-a inkhelah seeded pakuana Rybakina hian 6-1, 2-1 in hma a hruai a, set hnihna an khelh zawh hma hian a khingpui Kostyuk hi a banrek na vangin a inkhel zui thei lo a, a inhnukdawk zui ta a ni.

Inelna neih laiah hian player langsar chesual an tam hle a, seeded sang zual 10 zingah pasarih ngawt an tla tawh. Rybakina hi champion tura rinkai leh buk rit a ni chho a, Ninganiah Victoria Mboko nen an inhmachhawn leh ang.

Inkhel dangah Victoria Mboko hian Jessica Bouzas Maneiro chu 6-4, 6-2 in a lo hneh ve thung a, tualchhung tleirawl hian a match hmasa lamah seeded pakhatna Coco Gauff chu darkar khat leh minute hnih chhung lekin a lo hneh tawh bawk.

Kum 2019 khan Bianca Andreescu chuan WTA 1000 event-ah hian semifinal a lo lut tawh, ani hnuah Mboko hmeichhe zinga semifinal thleng leh thei hmasa ber a ni, anmahni rama inkhel an nih bawk avangin ṭantu a ngah hle ang.

Kum 18 mi Mboko chuan, "Ka tan chuan tournament khelh phak ringawt pawh kha a sang lutuk tawh a, semifinal thlen phei chu beisei phak baka sang a ni tawh, ka tan chuan a sang em em a ni," a ti a, a mumang ram aṭanga harh chhuah a duh rih loh thu a sawi bawk.